Өнгөрөгч өвөл, энэ хаврын хувьд Эрдэнэтийн дулааны станцын хашаан дахь газар чөлөөлөлтийн асуудал аймгийн Засаг даргын хэд хэдэн удаагийн шуурхайд өндрөө авч яригдсан. 

“Эрдэнэтийн дулааны станц” ТӨХК нь  51.8 сая ам. долларын төсөвтэй төслийг хэрэгжүүлж байгаа. Станцын хүчин чадлыг нэмэгдүүлж, шинэчилж ашгийг нь нэмэгдүүлэх өндөр ач холбогдолтой төслийн шавыг нь 2019 оны гуравдугаар сарын 22-нд тавьсан.  БНХАУ-ын 100 хувь төрийн өмчит “Hunan industrial equipment installation” компани 1 жилийн дотор гүйцэтгэхээр болж ажил эхэлсэн ч тодорхой зарим шалтгааны улмаас ажил зогсоод байсан. Түүний нэг нь станцын хашаан дотор баригдсан “Эрдэнэт Оргил” компанийн зөвшөөрөлгүй баригдсан барилгын газар чөлөөлөлтийн асуудал тээг болж улмаар Олон улсын хамтарсан манай улсад ач холбогдолтой энэ төсөл гацаанд ороод байлаа. Станцын дарга Л.Эрхбаатар удаа дараа аймгийн Засаг даргад газар чөлөөлүүлэх тухай хүсэлт гаргасны үр дүнд зөвшөөрөлгүй барилгыг буулгах ажлыг эхлүүлсэн юм.

Нийт 51.8 сая ам.долларын өртэгтэй энэ төсөл бол хөнгөлөлттэй зээл. Хөнгөлөлттэй зээлийн хүрд нэгэнт эргэчихсэн байхад манай аймаг, Дулааны станц “газар чөлөөлөлт эхлээгүй” гэдэг шалтгаанаар олон улсын энэ том төслийг зогсоох эрх байхгүй. Иймийн тулд төр “төмөр нүүр”-ээ харуулж дулааны станцын хашаанд байх эл байшинг буулгалаа. Энэ үйл явдалд станцын ажилчид, төрийн албан хаагчид гэлтгүй иргэд ч төр “төмөр нүүр”-ээ харуулах цаг болсон хэмээн үзэж байлаа. Эрдэнэтийн дулааны станцын энэхүү төсөл хэрэгжсэнээр бидэнд үнэхээр ач холбогдолтой. Тухайлбал, Эрчим хүчний эх үүсвэрүүдийн дундаж тарифаар тооцоход цахилгаан эрчим хүчний борлуулалт 56.2 тэрбумд хүрч цахилгаан эрчим хүчний өөрийн өртөг 65.04 төгрөгөөр бууран 82.2 төгрөг болох аж. Мөн “Эрдэнэтийн дулааны цахилгаан станц” ТӨХК-ийг жилд 12.79 тэрбум төгрөгийн ашигтай ажиллуулах тооцоо судалгаа гарчээ.      

Олон улсын төсөл хөтөлбөрийг гацаагаад байгаа уг компанийн газрыг албадан чөлөөлүүлэхээр 2020 оны арваннэгдүгээр сарын 9-нд аймгийн Засаг даргын А/658 дугаартай  захирамж гарсан. “Эрдэнэт оргил” компани Захирамжийг хүлээн зөвшөөрөхгүй гээд шүүхэд хандсан.  Захиргааны хэргийн шүүхээс “Эрдэнэт оргил” ХХК нь энэхүү газрыг хууль бусаар эзэмшиж байсан, газар эзэмших гэрчилгээ, гэрээгүй байсан тул газар албадан чөлөөлүүлэхээр гаргасан 2020-11-09-нд аймгийн Засаг даргын А/658 дугаартай  захирамж үндэслэлтэй хэмээн үзсэн юм.