Аймгийн хэмжээнд 2021 оны хаврын улирлын махны нийлүүлэлтийг хэвийн байлгах, хангамжийг нэмэгдүүлэх, үнийн төвшинг тогтвортой хадгалах зорилгоор нөөцийн махны худалдааг эхлүүллээ. 

Үүнтэй уялдуулан өнөөдөр аймгийн ЗДТГ, Мэргэжлийн хяналтын газар, Хүнс, хөдөө аж ахуйн газар, Шударга өрсөлдөөн хэрэглэгчийн төлөө газар, Хэрэглэгчдийн эрх ашгийг хамгаалах нийгэмлэгийн төлөөлөл мах бэлтгэдэг томоохон үйлдвэрүүд болох “Жаргалант мах импекс” ХХК, “Эрдэнэт Мах маркет” ХХК, “Эрдмийт” ХХК-ийн үйл ажиллагаатай танилцлаа. 

Үйлдвэрийн аргаар бэлтгэсэн, эрүүл ахуй, ариун цэвэр, стандартын шаардлага хангасан үхэр, хонь, ямааны нийт 390 сая төгрөгийн 300 тн махыг нөөцөлсөн бөгөөд аймгийн хэмжээнд 31 цэгээр худалдаалж эхэллээ. 

Ангилан савласан үхрийн мах 1 кг нь 8200, хонины мах 6900 төгрөг, ямааны мах 6200 төгрөгөөр борлуулагдаж байна.

Цаашид нөөцийн махыг бэлтгэх худалдаалах ажилд аймгийн ЗДТГ-ын Хөрөнгө оруулалт хөгжлийн бодлого төлөвлөлтийн хэлтэс, Мэргэжлийн хяналтын газар, Хүнс, хөдөө аж ахуйн газар, сумдын Засаг даргын тамгын газар, Хэрэглэгчийн эрх ашгийг хамгаалах нийгэмлэг, Шударга өрсөлдөөн хэрэглэгчийн төлөө газрын улсын байцаагч нар хяналт тавин ажиллана.