Эрдэнэтчүүд нийтээр энэ сард “соёлын довтолгоон” өрнүүлж байгаа. “Соёлыг  түгээе” аяныг аравдугаар сарын 11-ээс арваннэгдүгээр сарын 11 хүртэл нэг сарын хугацаатай  зарлаад эрвийх дэрвийхээрээ зүтгэж байна. Адаглаад л, төрийн байгууллагууд иргэдээ угтах үйлчилгээнд арай өөр дүр төрх оруулчих гэсэн, хотын соёлыг дэлгэрүүлэх зорилготой энэ удаагийн аяныг зарим нэг Соёлгүй нөхдүүд гутааж байх юм. “Эрдэнэт хөгжил 2021” эдийн засгийн форумын нээлт Захиргааны дөрөвдүгээр байранд болсон. Аймгийн ИТХ-ын дарга, аймгийн Засаг дарга, аймгийн ИТХ-ын төлөөлөгчид, “Эрдэнэт үйлдвэр” ТӨҮГ-ын удирдлага гээд олон арван хүн оролцсон нээлтийн арга хэмжээнд нэг нөхөр саравчтай малгайгаа арагш нь харуулчихаад, малгайгаа ч авахгүй урдуур хойгуур зураг дарж гүйв.

Эдийн засгийн форум бол манай аймагтаа л болж буй төрийн томоохон арга хэмжээ. Төрийн энэхүү том арга хэмжээнд, төрийн захиргааны байранд, гадаад дотоодын зочин, төлөөлөгчдийн өмнүүр малгайтайгаа манаргаж явдаг ийм үл бүтэх соёлгүй, боловсролгүй, бүдүүлэг нөхөд мэр сэр байх. “Малгайгаа аваач чи” гэхэд тоож байгаа ч юм алга. Эсвэл сонсоогүй юү, бүү мэд.

Энэ намраас эхлээд хайш яайш хувцасласан, үсээ будсан нэг нөхөр Тамгын газарт, аймгийн Засаг даргын шуурхайд зураг аваад яваа харагдах болсон. Д.Соёлчхүү дарга уг нь аймгийн Засаг даргын шуурхайд хэвлэлийнхэнийг таних тэмдэг, лого бүхий хантааз өмсч ирэхийг  шаарддаг. Юун толгойгоо ногоон энэ тэрээр будах. Гэтэл ийм нөхөр нэг хэсэгтээ л аймгийн дарга нарыг хаа яваа газар нь зургийг нь дардаг бололтой аппарат бариад гүйх болсон. ЗДТГ-ын Хэвлэл мэдээлэл олон нийттэй харилцах албанд  “даргын зураг дарагч” гэх албан тушаалтан байдаггүй. Гэтэл бүр сүүлдээ “даргын зурагчин” маань дүрдээ итгээд төрийн байгууллагын томоохон арга хэмжээнд малгайгаа ч авчих соёлгүй, бүдүүлэг зангаа нүүрэн дээрээ зурчихаад давхиж явах нь арай л биш ээ. Ядаж байхад бид энэ сард “Соёлыг түгээе” аяныг олон түмэнд хүргэчих гээд чадах чинээгээрээ ажиллаж хотын соёлыг бий болгох, нутагшуулах гэж дарга цэрэггүй зүтгэж байна. Гэтэл дарга нарын суганы үс, цүнх баригч ч байж мэдэх зарим нэг соёлгүй нөхөр үнэхээр муухай харагдаж байна, Соёлчхүү дарга аа.

Судлаад, сураглаад үзтэл энэ “сайн дурын зурагчин” өнгөрөгч хавар “I love Erdenet” гэж хашхираад л татвар төлөгчдийн мөнгөнөөс 4 сая төгрөг авсан байх юм. Сайн хашхирсанд нь мөнгө өгдөг бол тийм тэмцээнээ нээлттэй болгох хэрэгтэй.  Гэтэл хэвлэл мэдээллийн байгууллага нь аймаг, орон нутгийн мэдээллийг иргэдэд түгээж ажилласныхаа төлөө жилд ийм хэмжээний мөнгө авдаггүй. Төсвийн мөнгө ёолдоггүйн амьд жишээ энэ. “Соёлыг түгээе” аян Эрдэнэт хот даяар өрнөж байхад төрийн арга хэмжээнд малгайтай, тавьсан малгайны саравчаа  буруу харуулчихаад мангартаж яваа энэ зурагчин хаанахыг ямар ажил, албан тушаалтай хүн бэ. Уг нь монгол хүн чинь талийгаачаа хөдөөлүүлээд буцахдаа малгайгаа арагш нь харуулдаг байсан. Соёл мэддэггүй энэ мэт зураг дарагчид төрийн албан хаагч уу, төрлийн албан тушаалтан юм уу. Эсвэл соёлгүй ийм нөхдөд төрийн босго ийм намхан байдаг болсон уу гэж гайхахад хүрч байна.