Аймгийн ИТХ-ын ээлжит V  хуралдаан болж өнгөрлөө. Хурлаар аймгийн ИТХ-ын Тэргүүлэгчдийн бүрэлдэхүүнд өөрчлөлт оруулсан юм. МАН-ын Бүлгээс А.Түвшинжаргал, Ц.Алтаншагай, Д.Мөнхболд гурвыг тэргүүлэгчээс чөлөөлж оронд нь АН-ын төлөөлөл болох Д.Өсөхбаяр, Ц.Батхуяг, Д.Ганболд  нарыг  сонгосон. Энэ асуудлаар аймгийн ИТХ дахь МАН-ын Бүлгийн дарга А.Түвшинжаргалаас тодрууллаа.

-Аймгийн ИТХ-ын ээлжит хуралдаан боллоо. Тэргүүлэгчдийн бүрэлдэхүүнд өөрчлөлт оруулсан. Намын Бүлгийн даргын хувьд А.Түвшинжаргал төлөөлөгч аймгийн ИТХ-ын Тэргүүлэгчээс яагаад чөлөөлөгдчихөв?

-Би Улаанбаатар хотод албан томилолттой явж байна. Аймгийн ИТХ дахь манай намын Бүлгээр ярьж байгаад асуудлыг шийдсэн. Миний хувьд аймгийн ИТХ-ын төлөөлөгч, Тэргүүлэгч, МАН-ын Бүлгийн даргын сонгуульт ажилтай. Аймгийн ИТХ дахь АН, МАН-ын Бүлгүүд шүүхээр явж байсан асуудалдаа “Эвлэрэлийн гэрээ” байгуулж ойлголцсон, хамтарч ажиллахаар болсон учраас манай талаас 3 тэргүүлэгчийг чөлөөлөхөөр болсон. Миний хувьд Бүлгийн дарга учраас өөрийн саналаар тэргүүлэгчээс чөлөөлөгдөхөөр болсон. Хийх ажил их байна, харилцан ойлголцож хамтран ажиллахаар хоёр намын бүлэг тохироод байхад Бүлгийн даргын хувьд заавал Тэргүүлэгч байна гээд гэдийгээд байх нь аймаг, орон нутгийн ажил талаасаа ч улс төрийн соёл талаасаа ч энэ цагт таарахгүй, зохимжгүй байсан. Ингээд л шийдвэрээ гаргаж тэргүүлэгчээс чөлөөлөгдсөн.

-Нөгөө хоёр төлөөлөгч болох Ц.Алтаншагай, Д.Мөнхболд нарын хувьд тантай бас санал нэгдээд чөлөөлөгдөх шийдвэрээ гаргасан юм уу?

-Тэдний хувьд бол арай өөр асуудал. Аймгийн ИТХ-ын найм дахь удаагийн бүрэн эрхийг зарласан анхдугаар хуралдаанд Тэргүүлэгчдийг сонгох тухай асуудал байсан. Манай намын зүгээс тэргүүлэгчдийг 11 хүний бүрэлдэхүүнтэй байх, 9 нь МАН-аас, хоёр нь АН-аас байя гэсэн санал гарсан. АН-ын нөхөд үүнийг хүлээн зөвшөөрөөгүй, завсарлага авсан, улмаар хурлын дэг, горимоор 11 тэргүүлэгчээ сонгох учиртай байсан. Манай намын Бүлэг өөрийн 9 хүний нэрээ оруулж ирсэн. Харин АН-ынхан 2 гэдэг тоог хүлээн хүлээн зөвшөөрөөгүй. Хуралдааны дүрмийн дагуу 11 тэргүүлэгчийг сонгох байсан. Заалнаас Ц.Алтаншагай, Д.Мөнхболд нар нэрээ дэвшүүлээд Тэргүүлэгч болсныг та бүхэн санаж байгаа болов уу. Тиймээс манай намын Бүлэг дээр ярилцаад дээрх 2 хүнээ Тэргүүлэгчээс чөлөөлөх шийдвэр гаргасан.