Аймгийн Засаг даргын даваа гарагийн шуурхайд Эрүүл мэндийн газрын даргын үүргийг түр орлон гүйцэтгэгч Д.Сүхээ мэдээлэл хийсэн юм. Түүний мэдээллээс шуурхайд оролцогчид олигтой юм олж сонссонгүй. Ганц гэгээ татуулсан мэдээ нь “Хүүхдийн 50 ортой тасаг удахгүй өөрийн байрандаа өвчтөнөө хүлээн авах” тухай байлаа.  Ямар сайндаа л, шуурхайг удирдаж байгаа Д.Соёлчхүү дарга “Томуу яагаад улсын дунджаас их байгаа юм бэ. Таны ажлын хэсэгт аймгаас 50 сая төгрөг хуваарилаад  байхад чинь. Наад мэдээллээс чинь харахад улсаас татан авч ирсэн томуугийн вакцин чинь томуу хийлгэсэн иргэнийхээ тооноос даваа байна. Вакцинаа хувааж хийгээд байгаа юм уу” хэмээн асуухад хүрсэн.

Хариуд нь даргын үүргийг түр орлон гүйцэтгэгч Д.Сүхээ “ Манай аймагт томуугийн дэгдэлт улсын дунджаас 2.3 хувиар их, аймгуудынхаа 6.3 хувиар бага байгаа шүү. Томуугийн вакциныг хувааж хийсэн” гэж байхав.

 Эндээс харвал манай аймгийн Эрүүл мэндийн газрынхан “...томуугийн өмнө толгой бөхийлгөөд аргаа барахдаа томуугийн вакциныг иргэдэд хувааж хийгээд байна” гэж шуурхайд оролцогсод төдийгүй хэвлэлийнхэн ч ийм ойлголт авахад хүрлээ. Томуугийн вакциныг ямар тохиолдолд хувааж хийдэг, дараагийн вакциныг хэзээ татан авах, хүрэлцээ хангамж нь ямар байгаа энэ тэр талаар мэдээлэл алга. Эмнэлэгт хандсан өвчтөнүүдийн хэд нь хүүхэд байгаа, хэдийг нь хэвтүүлсэн хэдийг нь буцаасан зэрэг амбулаторийн журнал дээрээс түүсэн хэдэн тоо томуугийн дэгдэлтийг хязгаарлахгүй л дээ. Томуу ийм дүр зурагтай байгаа юм чинь өнөөх коронагийн талаар албан ёсны мэдээлэл бүр ч алга. Хэдхэн хоногийн өмнө Монголын үндэсний олон нийтийн телевизийн “Цагийн хүрд” нэвтрүүлгээр “Хөдөө орон нутагт короангийн дэгдэлт буурч байгаа  ч хамгийн өндөр нь Орхон аймагт 29 тохиолдол бүртгэгдлээ” гэж  мэдээлсэн. Уг нь аймгийн хэмжээнд цар тахлын нөхцөл байдал ямар байгаа талаар ядаж 7 хоногт нэг удаа албан ёсны мэдээлэл хийх учиртай, Эрүүл мэндийн газрынхан.

Хэвлэлийнхэн гэлтгүй, иргэд ч мэдээлэл авах эрхтэй. Дэгдэлт өндөр үед, дарга нар шаарлага тавьдаг, иргэд ч коронад анхаарлаа хандуулдаг цагт хэвлэлийнхэн мэдээлэл хүргэдэг, бүр зарим нэг нь цогцос тоолдог байлаа шүү дээ. Цар тахал дуусаагүй, тайвширах болоогүй байхад  Эрүүл мэндийн газрынхан арай л найзгайруу юу даа. Тэгээд ч Д.Сүхээ гэдэг ДҮГ /Даргын үүрэг гүйцэтгэгч/-ээс нэг их ажил хүлээгээд нэмэргүй нь бололтой. Ахмад эмч нар, эрүүл мэндийн салбарынхан “Манай аймаг ганц гайгүй мэс засалч эмчтэй болох нь гэж байтал чи дарга болвол их хөөрхөн харагдана. Машин унана, тамга барина. Их гоё ш дээ гэж ятгасаар байгаад Сүхээг сандалд хадчихлаа. Хайран мэргэжил, хайран сайхан залуу” хэмээн халаглаж суусан. Омикрон ч билүү тэр нэг нөхөр биднээс холуур л өнгөрөөсэй билээ гэж залбирахаас өөр арга алга.