Манай аймаг 2012-2020 онд 9 жил дараалан Өрсөлдөх чадварын үзүүлэлтээр 21 аймгаа тэргүүлж улсад манлайлж байв. Харин энэ удаад 2021 оны үзүүлэлтээр нэг байраар ухарч, улсад аман хүзүүдэж Дорноговь аймгийн дараа жагсжээ. Эдийн засгийн бодлого, өрсөлдөх чадварын судалгааны төвөөс "Аймгуудын өрсөлдөх чадварын 10 дахь жилийн тайлан"-г гаргаж олон нийтэд ил болгожээ.

Энэ удаад Орхон аймаг засаглалын үр ашиг, бизнесийн үр ашиг, дэд бүтэц бүлгүүдийн оноо буурч тэргүүн байраа алдахад хүрсэн байна. Өөрөөр хэлбэл, манай аймгийн хувьд 2021 онд 2020 оны мөн үеийнхээс засаглалын үр ашиг, биенесийн үр ашиг, дэд бүтцийн хувьд үзүүлэлтүүд буурч хоёрдугаарт эрэмблэгдэхэд хүрснийг судлаачид онцолж байна.

Өрсөлдөх чадварын үзүүлэлтээр эхний байруудад Дорноговь, Орхон аймгийн араас Дархан-Уул, Өмнөговь, Говьсүмбэр удаалсан. Харин Баянхонгор, Говь-Алтай, Дундговь, Завхан, Булган аймаг хамгийн бага үнэлгээ авсан байна.

Нийт 21 аймгаас 3 аймгийн өрсөлдөх чадварын ерөнхий оноо буурсан нь Увс, Завхан, Орхон аймгууд юм.

Ийнхүү манай аймаг 10 жилийн турш гаргаж байгаа Өрсөлдөх чадварын үзүүлэлтийг 9  жил дараалан тэргүүлсэн бол энэ удаад нэг байраар ухарч хоёрдугаарт жагссан байна.