Аймгийн ЗДТГ-ын иргэдийн санал хүсэлтийг хүлээн авах 70353511 тоот утсанд иргэдээс ирүүлсэн санал гомдлыг аймгийн Засаг даргын шуурхайд албан ёсоор танилцуулдаг. Энэ удаад нэгэн иргэнээс “4 дүгээр цэцэрлэгийн бага бүлгийн багш Нямдэлгэр гурван настай ангийн багш ханиадтай хүүхэд цэцэрлэгт аваад бусад хүүхдэд ханиад халдварлуулаад байна. Мөн 1 хүүхдээс 40 мянган төгрөг хурааж ус шүүгч, тоглоом авсан. Багшид нь ханиадтай хүүхэд авахгүй байх талаар мэдэгдэж өгнө үү” гэсэн өргөдлийг гаргасан байна. Иргэний энэхүү өргөдөл, гомдолд манай аймгийн Засаг дарга түүний Тамгын газар болоод Боловсрол, шинжлэх ухааны газар хариу өгөөгүй байна. Бүр шийдвэрлэгдээгүй өргөдөл, гомдол гэсэн жагсаалтад багтжээ.

Гуравдугаар сард хүүхдийн ханиад их байна гэж хэлээд нийтээр нь цэцэрлэгийг хаасан. Ажилтай, ээлжийн ажилтай, амьдралаа залгуулах гэж лангуу түрээсэлдэг иргэдэд ч энэ шийдвэр хүнд туссан. Цэцэрлэгт эмч гэж байдаг. Өглөө ирсэн хүүхдийн халуунтай эсэхийг хянаж чадахгүй аргаа барахдаа аймгийн Онцгой комисст хүсэлт гаргаад 14 хоног хүүхдүүдийг хөл хорионд оруулсан. Гэтэл өнөөдөр нэг цэцэрлэгийн багш ханиадтай хүүхэд ирэхэд хүлээж аваад ангийнханд нь ханиад халдаагаад байгаа талаар хэн ч ам нээсэнгүй. Эрүүл мэндийн газар, Нийтийн эрүүл мэндийн төвийнхөн энэ хаваржингаа засварын ажлаас нэг их илүү гарсангүй. Бүр дээр нь нэг хүүхдээс 40 мянган төгрөг хураагаад ус шүүгч, тоглоом авч байгаад арга хэмжээ авах нь бүү хэл анзаардаг газар, дарга нар үгүй болжээ. Манай аймаг цэцэрлэгийн хүүхдийн тоглоомыг татвар төлөгчдийн мөнгөөр тендэр зарлан худалдан авч өгдөг байсан. Одоо болиод иргэдээс 40 мянган төгрөг хүүхдийн нэрээр авч байгаа юм уу. Нэг үхрийн эвэр хөдөлвөл мянган үхрийн эвэр доргидог гэдэгчлэн асуудлыг бага дээр нь даруйхан шийдэхгүй бол цэцэрлэгийн хүүхэдтэй гэр бүл 40 мянган төгрөгийн ус шүүгч, тоглоомонд тун удахгүй нидрүүлэх нь. Манай дарга нар энэ мэт өргөдөл, гомдлыг шийдэхгүй бол ядаж өргөдөл гаргасан иргэнд “ Манайх шийдэх боломжгүй, Боловсролын сайдад ханд” гээд хариуг нь өгчихвөл арай дээр биш үү. Эсвэл Л.Оюун-Эрдэнийн Засгийн газрын төсвийн хэмнэлтийн бодлогод цэцэрлэгийн хүүхдүүдэд ус шүүгч, тоглоом авч өгөхгүй ар гэр цэцэг, эхчүүдээс нь ав гэсэн зорилт байгаа бол түүнийгээ иргэдэд ил тод болгох хэрэгтэй байна.