Иргэдээс аймгийн ЗДТГ-ын нутгийн удирдлагын ордны хойд талд байрлах “Хөх Монгол” цогцолборын бетонон хашааг буулгаж эрдэнэтчүүдэд нээлттэй, ногоон байгууламж бүхий орчин болгох талаар санал хүсэлтийг ирүүлээд байгаа. Үүний дагуу аймгийн Засаг даргаас холбогдох албаныханд үүрэг өгч судалгааны ажил хийгдэж байна. Тухайлбал, аймгийн Соёл, урлагийн газраас “Хөх Монгол”  цогцолборын бетонон хашааны хэмжилтийг хийжээ. Мөн хашааг буулган тохижуулах зураг төсвийн ажлыг хийж эхэлсэн байна.

“Хөх Монгол” цогцолбор буюу эрдэнтчүүдийн нэрлэдгээр “бортгон малгай”-г 2014 оноос эхэлж барьсан. Орон нутгийн 2 тэрбум гаруй төгрөгөөр барилгыг барьсан бол зөвхөн бетонон хашааг барьж байгуулахад 360 сая төгрөг зарцуулсан юм. Мөн хашааны гадна талд зураг зурахад ч хэдэн арван сая төгрөгийг зардал гаргаж байсан билээ. Иргэдэд хаалттай, бетонон хашаан дотор юу байдгийг тэр бүр Эрдэнэтийнхэн мэддэггүй.  “Эрдэнэт хотын өдөр”-өөр буюу ижл бүрийн арванхоёрдугаар сарын 11-нд хаалгыг нь нээж “бортгон малгай” доторх тухайн үеийн АН-ын удирдлага, ардчилагчдын эртний хүлэг баатруудын дүрээр “амилсан” зургаас өөр үзвэргүй “Хөх Монгол”-ын хашааг буулгаж агаар оруулах саналыг иргэд гаргасныг аймгийн удирдлага дэмжээд байна.