“Бүх нийтээр мод тарих аян”-ы хүрээнд аймгийн Засаг дарга С.Батжаргалаас тодруулга авсан юм.

-Өнгөрсөн жил манай аймгийн хувьд хамгийн их мод тарьсан орон нутгаар шалгарсан. Тарих нэг хэрэг хамгийн гол нь ургуулах явдал. Өнгөрсөн жил тарьсан модны ургалт ямар хувьтай байна вэ?

-Тарихаасаа ургуулах нь хамгийн чухал. Бид бүхэн тарьсан бүх газрууддаа хавар, намар тооллого явуулдаг.  2021 оны тарьсан модны үзүүлэлт 83 хувьтай гарсан. Тодорхой хувь нь эрсдэлтэй байдаг  модыг 3 жил арчлахад цаашаа өөрөө биеэ даагаад ургачихдаг. Тиймээс 3 жилээр тарьж ургуулж байгаа модыг төрийн байгууллага болон төрийн өмчит компаниуддаа хуваарилж, хариуцуулж өгч байгаа. Энэ жил “Ногоон-Эрдэнэт” хөтөлбөрийн хүрээнд Эрдэнэт хотдоо Тарлан толгойн ард талын энгэрийг бүрэн ойжуулья гэж шийдсэн .Энэ ажлын хүрээнд 3 жилийн хугацаатай Худалдан авах ажиллагаагаар авсан компани арчилж ургуулах ёстой. Бид дараа нь хүлээж авах ёстой. Тарьсан модны ургалт ч улсын хэмжээнд өндөр үзүүлэлттэй байгаа.

-Гэр бүлийн сар энэ өдрүүдэд тохиож байна. Таны санаачлагаар “Гэр бүлийн төгөл”-ийг байгуулж моджуулахаар болсон. Энэ талаар тодруулна уу?

-”Гэр бүлийн ойн төгөл”-ийг гэр бүлийн сартай уялдуулж зохион байгуулж байгаа. Гэр бүлээрээ, анги хамт олноороо, найз нөхөд, байгууллагаараа Баян-Өндөр уул руугаа алхдаг, агаарт гардаг арга хэмжээ, зохион байгуулдаг, эрдэнэтчүүд. Энэ үедээ өөрсдийн тарьсан модоо арчилдаг, хэр ургаж байгааг шалгадаг, ийм тогтолцоо эрүүл амьдралын хэв маягыг бүрдүүлэх зорилгоор энэ ажлыг санаачлаад хийж байна. “Гэр бүлийн төгөл”-ийн арчилгааг Сум дундын ойн анги хариуцаж хийнэ. Ургах -Арчлах асуудлыг мэргэжлийн байгууллага хариуцаж байгаа учир өмнөх жилүүд шиг хавар намарт нэг удаагийн зохион байгуулалттай тарилт болоод хаяхгүй. Энэ жилийн мод ургана гэдэгт итгэлтэй байна.

-Мод үржүүлгийн аж ахуй, иргэдийг дэмжих нь хамгийн чухал болоод байна. Энэ чиглэлээр ямар бодлого барьж байна вэ?

Бид өнгөрсөн жил Орхон аймгийн мод нийлүүлдэг, ойн нөхөрлөлүүд төрийн бус байгууллагууд, компаниудтай уулзсан. Эдгээр байгууллагуудаа дэмжинэ. Эрдэнэт үйлдвэртэй ярилцсан, мод суулгац авахдаа эд нарыгаа дэмжээрэй гэдгээ хэлсэн.  Модыг хамгийн найдвартай ургуулдаг, өсгөдөг зүйл бол хүлэмжийн аж ахуй байна. Тиймээс хүлэмжинд мод тарих газруудыг Баян-Өндөр, Жаргалант сумд газар зохион байгуулалтын төлөвлөгөөнд оруулаад өгсөн. Энэ дээр мэргэжлийн байгууллагуудтайгаа хамтраад ажлаа хийж байна. Бид худаг ус, тог цахилгааны асуудлыг шийдэж өгнө. Ингэхээр Орхон аймагт тарьж байгаа модны хэмжээ өснө.

-Сум дундын ойн ангийн хүчин чадлыг нэмэгдүүлснээр мод тарих, ургуулах ажил илүү мэргэжлийн тал руугаа хандах нь ээ?

 Өнгөрсөн жил бид ”Ногоон-Эрдэнэт” хөтөлбөрөө хэлцүүлж байхад Ерөнхийлөгч “Тэрбум мод” үндэсний хөтөлбөрөө танилцуулж, зарлаад орон даяар өрнөсөн ажил болсон. Иймээс бид Сум дундын ойн ангийхнаа хүчин чадлыг 1дахин нэмэгдүүлсэн, ажиллах хүчний түвшин, хөрөнгө мөнгийг аймгийн Иргэдийн хурлаар батлуулчихсан. Тиймээс бид Сум дундын ойн ангиасаа тарьж байгаа модныхоо тоог жилд нэг удаа нуглаад байх боломжтой тооцоолол гаргасан. Ингэснээр манай аймаг  20 сая мод тарих бүрэн боломжтой болж байна. 2030 он хүртэл ойн нөхөн сэргээлт, ногоон байгууламжтай холбоотой мод тарилтын хүрээнд бүрэн биелүүлэх боломжтой гэж үзэж байгаа. Байгууллагууддаа хариуцуулаад мэргэжлийн байгууллагууд шалгаад явахаар ургах хувь нь өснө гэж тооцож байна.