Олон Улсын хүүхдийн эрхийг хамгаалах өдрийн соёл урлагийн хөтөлбөрийн талаар Соёл, урлагийн газраас хэвлэлийн бага хурал хийв. Коронавирус цар тахалтай холбоотойгоор сүүлийн хоёр жил Олон улсын хүүхдийн эрхийг хамгаалах өдрийг тэмдэглэлгүй өнжсөн. Энэ жил хүүхэд бүрт хүртээмжтэй, сонирхолтой байхаар олон төрлийн арга хэмжээг  зохион байгуулахаар бэлтгэл ажлаа хангаж байгаа талаар зохион байгуулагчид мэдээллээ. 

     Зургаадугаар сарын 1-ний 11.00 цагт Амарын талбайд Орхон аймгийн 500 хүүхэд багачуул оролцсон “Эрдэнэтийн хүүхдүүд дуулж байна” найрал дуугаар Олон Улсын хүүхдийн эрхийг хамгаалах өдрийн арга хэмжээг эхлүүлж аймгийн сургууль, цэцэрлэгийн хүүхэд багачуудын урлагийн тоглолтоор үргэлжилнэ. Мөн уран зураг, сагсан бөмбөг гэх мэт олон төрлийн тэмцээн уралдаан болох юм.
       Үдээс хойш 15.00 цагаас Амарын талбайд байрлуулсан тайз дэлгэц чөлөөтэй байх учир албан байгууллагууд хүүхэд багачуудаа баярлуулахад нээлттэй байхыг зохион байгуулагчид хэллээ.
“Эрдэнэт цэцэрлэгт хүрээлэн”-д  14.00 цагаас  баярын арга хэмжээ үргэлжлэх бөгөөд “OPEN MIC”, шүлэг, бүжгийн тэмцээн болох учир аав, ээжүүд хүүхдүүдээ сонирхсон тэмцээнд оролцуулах боломжтой ажээ.