“Эрдмийн сан” сургуулийн Д.Оюунгэрэл багштай 2-ын А ангийн бяцхан сурагчид Хос үсгийн баяраа хийлээ. Энэ удаагийн Үсэглэлийн баяр ихээхэн онцлогтой болсон юм. АБТА Д.Оюунгэрэл багштай 2-ын А ангийн бяцхан сурагчдын хувьд 2021-2022 оны хичээлийн жилд Монгол, Англи хэлний цагаан толгойн үсэгт бүрэн тайлагдаж, уншиж бичиж сурснаа сургууль, эцэг эхчүүддээ тайлагнасан юм.

Хос үсгийн баярын нээлийн ажиллагаанд “Эрдмийн сан” сургуулийн захирал Г.Өлзийбаяр хэлсэн үгэндээ “Манай сургуулийн хувьд 2021-2022 оны хичээлийн жилээ сурлагын өндөр амжилтаар үдэж байна.

Аймгийн математикийн олимпиадад манай сургуулийн багш Доржзовдын удирдсан сурагч Гэрэлхүү, Гүр-Аранз нар хүрэл медаль хүртсэн. Мөн багш маань ч медаль хүртсэн сайхан амжилт үзүүлсэн. Энэ хичээлийн жилд манай сургууль нэгдүгээр ангиас эхлэн англи хэлний хичээлийг Америкийн нэгдсэн улсаас ирсэн багшаар заалгасан. Эрдмийн сан сургуулийн 26 жилийн түүхэнд анх удаа Д.Оюунгэрэл багштай 2-ын А ангийн сурагчид Хос үсгийн баяраа тэмдэглэж байна. Монгол, англи хэлний цагаан толгойн үсгээ эзэмшиж уншиж, сурсан бяцхан багачуулдаа сурлагын өндөр амжилт хүсэн ерөөе” гэсэн юм.  

Д.Оюунгэрэл багштай 2-ын А ангийн сурагчид англи, монгол хэлний эрдмийн цагаан толгойд тайлагдсаны зэрэгцээ англи хэл дээр сурсан дуугаа дуулж, шүлгээ уншиж, энэ хичээлийн жилд хийж бүтээсэн зүйлээрээ бүтээлийн үзэсгэлэн гаргасан байв. Мөн дуу хөгжмийн хичээлээр сурсан буриад бүжиг бүжиж эцэг эхчүүддээ сонирхуулсан нь олны талархлын хүлээж байлаа.