Ш.Отгонбилэгийн нэрэмжит “Эрдэнэт” технологийн сургуулийн зааланд 2022 оны Зуун буудалт даамын сонирхогчдын Улсын аварга шалгаруулах тэмцээн болж байна. Энэ удаагийн сонирхогчдын Улсын аварга шалгаруулах тэмцээн хөдөө, орон нутагт 5 дахь удаагаа болж байгаа билээ. Улсын аварга шалгаруулах тэмцээнд 14 аймаг, нийслэлийн 9 дүүргийн 103 даамчин эрэгтэй, эмэгтэй төрөлд өрсөлдөж байна. Тэмцээн үндсэн болон блиц гэсэн хоёр ангиллаар явагдах агаад тамирчид 9 өрөг тоглож аваргаа тодруулах юм.

Орхон аймагт анх удаагаа болж байгаа Зуун буудалт даамын улсын аварга шалгаруулах тэмцээний нээлт баасан гарагт болсон бол тэмцээний аваргууд ням гарагт тодрох юм. Энэ удаагийн тэмцээнийг Д.Доржпүрэв тэргүүнтэй Орхон аймгийн Зуун буудалт даамын холбоо, аймгийн ЗДТГ, Орхонг аймгийн Биеийн тамир, спортын газар, “Эрдэнэт” технологийн сургуулиуд хамтран зохион байгуулж байна. Тэмцээний нээлтэд Монголын Зуун буудалт даамын холбооны Ерөнхийлөгч Ц.Эрдэнэбилэг, Орхон аймгийн Даамын холбооны тэргүүн, аймгийн ИТХ-ын төлөөлөгч Д.Доржпүрэв, аймгийн Засаг даргын орлогч А.Түвшинжаргал, аймгийн Биеийн тамир, спортын газрын дарга Д.Дэлгэрбаяр болон албаны хүмүүс, тамирчдын төлөөл оролцлоо.   

Тэмцээний нээлтийн үеэр аймгийн Засаг даргын орлогч А.Түвшинжаргал хэлсэн үгэндээ “Зуун буудалт даамын улсын аварга шалгаруулах тэмцээнд оролцогч тамирчдад амжилт хүсье. Манай Орхон аймагт тавтай морилно уу. Манай аймгийн хувьд биеийн тамир, спортын дэмжих чиглэлээр орон нутгийнхаа төсөвт 200 гаруй сая төгрөгийг төсөвлөж, уралдаан тэмцээнд оролцож байгаа тамирчдаа дэмждэг. Үүний зэрэгцээ  жил бүр 200 гаруй саа төгрөгийг спортын салбарт хөрөнгө оруулалт хэлбэрээр зарцуулдаг. Ингээд та бүхний тэмцээнд амжилт хүсье. Орхон аймагт өнгөрүүлсэн энэ удаагийн тэмцээний дурсамж тань гэгээлэг сайхан байх болтугай” хэмээлээ. Тэмцээний нээлтийн үеэр Монголын Зуун буудалт даамын холбооноос амжилт гаргасан тамирчдад шагнал гардууллаа. Орхон аймгийн тамирчин У.Дэлгэрбаяр спортын дэд мастерийн болзол хангасан тул спортын дэд мастерийн энгэрийн тэмдэг, үнэмлэх гардууллаа. Мөн Зуун буудалт даамын тамирчин  Э.Намуунзаяа, Г.Гэрэлмаа, Т.Мөнхмандах нар дэд мастер энгэрийн тэмдэг, үнэмлэхээ гардан авав. Тамирчин Г.Дэлгэрмаагийн хувьд Зуун буудалт даамын I зэргийн үнэмлэхээ гардан авсан юм.     Зуун буудалт даамын спортыг орон нутагт хөгжүүлэхэд үнэтэй хувь нэмрээ оруулсан зарим иргэнийг аймгийн ИТХ, болон аймгийн засаг даргын Жуух бичгээр шагнаж урамшууллаа.