Ийм нэг дүр зураг жолооч нарт аюул дагуулж эхэллээ. Өнгөрсөн жил нэг хоёрдугаар микрийн дундах инженерийн шугам сүлжээг шинэчлэх ажлыг “Тавин лан” компани хийж гүйцэтгэсэн. Бүр цаашлаад ногоон байгууламж, зам талбай зэргийг нь хуучин хэвэнд нь оруулах ажлыг тэд хийсэн. Гэтэл өчигдрөөс эхлэн хоёрдугаар микрийн 10, 11 дүгээр байрны дундах туслах замын эхэнд нэг ийм том нүх, ангал үүсжээ. Сайн өнгийж харвал тун инээдтэй.

Энэхүү туслах зам дээгүүр тавьсан асфальт бүүр хөндий, хоосон байх нь ажиглагдана. Хажуу талын ногоон байгууламжийн хөрс шороо мэдэгдэхүйц доошоогоо суулт өгсөн байна. Орой үдшийн цагаар жолооч нарт энэ бол маш том аюул. Магадгүй машин техникээ эвдээд зогсохгүй жолооч, зорчигч эрүүл мэндээрээ хохирч болох нь. Бүр цаашлаад энэ зам цөмөрч ч мэдэхээр болжээ. Бүтээн байгуулалтын ажилд хяналт тавьдаг хяналтын инженерүүд нь юу харж байсан юм бол.

Ажлыг хүлээн авсан улсын комисс, чанарын баталгаа энэ тэр нь хаана яваа бол. Эрдэнэтчүүдийнхээ өмнөөс энэ бүхнийг “Түргэн шийддэг Түмээ даргадаа хамгийн түрүүнд дуулгая”. Ниргэсэн хойно нь хашхирах биш, нэг юм болохоос нь өмнө арга хэмжээ авах цаг болжээ.