Аймгийн Засаг даргын шуурхайд Боловсрол, шинжлэх ухааны газрын дарга О.Ариунгэрэлт хичээлийн шинэ жилийн бэлтгэл ажлын талаар болон цэцэрлэгийн хамран сургалтын талаар мэдээлэл өгсөн. Энэ үеэр Баян-Өндөр сумын Засаг дарга Б.Баасансүрэн “Хамран сургах тойргийн хүрээнд тавдугаар хорооллын 15, 41 дүгээр байрны цэцэрлэгийн насны хүүхдүүд Баянбулагийн цэцэрлэгт явах ёстой гээд байна. Иргэдээс энэ талаар их гомдол, санал ирж байна. Үүнийг яаж зохицуулах вэ. Тавдугаар хорооллынхоо цэцэрлэгт хүүхдээ өгмөөр байна гэдэг санал гаргаж байна” хэмээн асуусан юм. Үүнд О.Ариунгэрэлт дарга дараах хариултыг өглөө.

“Цэцэрлэгийн хамран сургалтын хүрээнд тавдугаар хороололд 1000 гаруй өрхийн 700 гаруй цэцэрлэгийн насны хүүхэд бий гэдэг судалгаа байгаа. Энэ хүүхдүүд I болон V цэцэрлэгт харьяалагдаад явж байгаа. “Их хаадын цуваа”-гийн эцэг эхчүүд нь Городын аль нэгэн цэцэрлэгт хүүхдээ өгмөөр байна гэсэн хүсэлт гаргадаг. Энэ хорооллын эцэг эхчүүд гэрийнхээ ойр гэвэл 18 дугаар цэцэрлэгт хүүхдээ өгч болно. Заавал Городын цэцэрлэгт хүүхдээ өгнө гэвэл 15 дугаар цэцэрлэгт хүүхдээ өгч болно. Манай газраас ийм зохицуулалтыг хийгээд байна” гэлээ.