Боловсролын салбарын төсвийн шинэчлэлийг хэрэгжүүлэх, багш нарын ачааллыг бууруулж, ёс зүйг дээшлүүлэх, хүүхдийн нийгэм, сэтгэл зүй, танин мэдэхүйн хөгжлийг дэмжих, сурах тэгш боломж бүрдүүлэх зэрэг томоохон зорилго зорилт дэвшүүлсэн хичээлийн шинэ жилийн босгон дээр аймгийн багш нар “Багш нарын бага хурал”-аа хийлээ.   Цар тахалтай байсан сүүлийн хоёр жилийн хугацаанд улс орон төдийгүй  аймаг орон нутгийн төсөв хүндрэлтэй байсан цаг үед боловсролын байгууллагын төсвийг бууруулахгүй байхад онцгойлон анхаарсан гэдгийг аймгийн удирдлагууд онцолсон. 

      2022 онд аймгийн боловсролын салбарт улсын төсвөөс 8,2 тэрбум, орон нутгийн төсвөөс 3,6 тэрбум нийт 11,8 тэрбум төгрөгийн хөрөнгө оруулалтыг хийж,төлөвлөсөн ажлууд үргэлжилж байна.  Тухайлбал, 3 цэцэрлэгийн өргөтгөл, шинээр 2 цэцэрлэг, 1 сургуулийн дотуур байр, 1 сургуулийн өргөтгөл ашиглалтад оржээ. Багш нарын бага хуралд 450 багш оролцож 2022 онд аймаг, улсын төсвийн хөрөнгө оруулалтаар хийсэн ажил болон хэрэгжүүлж буй төсөл хөтөлбөрүүдийг танилцуулсныг тоймлон хүргэе. 

Боловсролын салбарт хийсэн хөрөнгө оруулалтаас...

• Энэ жил 3 дугаар сургуулийн барилгыг буулгаж 960 хүүхдийн суудалтай сургууль шинээр барих,
•  8 дугаар сургуулийн 320 хүүхдийн суудалтай өргөтгөлийг барих,
•  Цагаанчулуут багт 150 хүүхдийн цэцэрлэгийн барилга барих зэрэг томоохон бүтээн байгуулалтын ажлуудыг улс болон орон нутгийн төсвийн хөрөнгө оруулалтаар эхлүүлээд байна. 
• Засаг даргын 2020-2024 оны үйл ажиллагааны хөтөлбөрт тусгагдсаны дагуу багшийн хөгжлийг дэмжиж, сургалтад ашиглагдах шаардлагатай хэрэглэгдэхүүнээр хангах ажлыг БШУЯ-тай хамтран зохион байгуулж 1,8 тэрбум төгрөгийн хөрөнгө оруулалтаар СӨБ-ын байгууллагын нийт багш нарт 425 ширхэг зөөврийн комьпютер, ЕБС-ийн багш нарт 1135 ширхэг таблетыг хүлээлгэн өгөхөд бэлэн болов.
• Сургалтын орчны аюулгүй байдлыг хангах чиглэлээр орон нутгийн төсвийн 365,5 сая төгрөгөөр энэ жил долоон цэцэрлэгт 143  хяналтын камер суурилуулав. Ингэснээр Орхон аймгийн бүх цэцэрлэг 100 хувь хяналтын камертай болсон. 
• Цахим Эрдэнэт хөтөлбөрийн хүрээнд 280 сая төгрөгийн хөрөнгө оруулалтаар ЕБС, МСҮТ-үүдэд сургалтад ашиглагдах ухаалаг дэлгэц, улсын төсвийн хөрөнгө оруулалтаар ЕБС-иудад шалгалтын тест засагч машинуудыг тус тус хүлээлгэн өгсөн.

Боловсролын салбарт хэрэгжүүлж буй хөтөлбөрүүдээс...

Аймгийн боловсролын салбарт багш, сурагчдын хөгжлийг дэмжсэн олон шинэлэг төсөл, хөтөлбөрүүдийг хэрэгжүүлж байгаа. 
Тэдгээрийн нэг нь “Эх хэл Эрдэнэт” хөтөлбөр юм. Энэхүү хөтөлбөрийн зорилго нь Монгол хэлний тухай хуулийн хэрэгжилтийг хангаж, иргэд, хүүхэд залуучуудын эх хэлний боловсролыг дээшлүүлэх зорилготой.

• Хөгжлийн бэрхшээлтэй хүүхдийг боловсролд тэгш хамруулах “Тэгш боломж” төсөл,
• Сургуулийн насны хүүхдүүдэд эрүүл мэндийн боловсролыг шинэлэг хэлбэрээр олгох “Эрүүл хүүхэд” төсөл, 
• Сурагчдад урлаг, спорт, гоо зүй, технологи, амьдрах ухааны боловсрол олгох “Хүүхдийн хөгжил” зэрэг хөтөлбөрүүдийг хэрэгжүүлэхээр баталсан. 
• Мөн 6 дахь жилдээ хэрэгжиж буй “Багш” хөтөлбөрийн хүрээнд багш нарыг судалгаа шинжилгээний ажил хийх арга зүйд суралцуулах, анги удирдсан багшийг мэргэшүүлэх, хөгжүүлэх зэрэг олон асуудлыг тусган хэрэгжүүлж байна. 
• Багш нарын ачааллыг бууруулах, тэдний нийгмийн баталгааг хангах үйл ажиллагааны хүрээнд хотын төвийн 10 цэцэрлэгийг 2 ээлжид шилжүүлсэн. Үүний үр дүнд 50 гаруй ажлын байр шинээр бий болохын зэрэгцээ багш нарын ачаалал буурч, эцэг эхчүүд тайван ажлаа хийх боломж бүрдсэн. Цаашид энэ ажлыг эрчимжүүлж 2 ээлжийн багштай цэцэрлэгүүдийн тоог нэмэгдүүлэхээр 2023 оны улсын  төсвийн төсөлд санал хүргүүлээд байна.