Боловсрол, шинжлэх ухааны сайд Л.Энх-Амгалан боловсролын байгууллага дахь хуурамч дипломны асуудлыг гаргаж ирсэн. Бүр аймаг, орон нутгаар нь жагсааж байгаад хуурамч дипломтой багш нарынх нь тоог гаргасан. Орхон аймгийн хувьд дээрх жагсаалтад 52 багш хуурамч дипломтой гэдгээрээ нэлээн дээгүүр жагссан. Ерөнхий боловсролын сургууль, сургуулийн өмнөх боловсролын байгууллага болох цэцэрлэгийн багш нарын бичиг баримтыг шалгах ажил өнгөрсөн хавар өрнөсөн. Боловсрол, шинжлэх ухааны яамнаас хийсэн энэ ажилд манай аймгийн сургууль, цэцэрлэгийн багш нарын 98 хувь нь хамрагдсан аж. Энэхүү 98 хувиас 52 хүн нь хуурамч дипломтой хэмээн баригджээ.  Аль сургуулийн, ямар цэцэрлэгийн хэн гэдэг багш хуурамч дипломтой байсан тухай мэдээлэл нь хувь хүний нууцтай холбоотой асуудал учраас өнөөдрийн байдлаар манай аймагт нэр устайгаа тодроогүй байна.

Харин хамгийн сүүлийн үеийн мэдээллээс харвал 2022-2023 оны хичээлийн жилийн өмнөхөн дээрх 52 хуурамч дипломтой нөхдийн тал илүү хувь нь боловсролын салбараас үндсэндээ зугтжээ. Их, дээд сургууль төгссөн эсэх нь эргэлзээтэй, Боловсрол, шинжлэх ухааны яамны мэдээллийн бүртгэлд нэр ус, дипломны дугаар нь байхгүй нөхдүүдийн бичиг баримтыг хавар хураан авч төвлөрүүлсэн байна. Энэ бүхнээс болсон уу, хуурамч бичиг баримтын асуудал хөндөгдсөн учраас тэр үү ямартай ч ийнхүү талаас илүү нь мөрөө хөөгөөд боловсролын салбараас холджээ. Зарим нэг судалгаанаас харвал хуурамч дипломны асуудал сургуулийн өмнөх боловсролын байгууллагад илүүтэй байдаг ажээ. Мэдээж математикийн багшийн хуурамч дипломтой хүн арав алхахгүй л баригдана. Харин цэцэрлэгийн болон бага ангийн багш хийгээд их, дээд сургуулиа 2, 3 дугаар дамжаанаас нь сургуулиа хаячихсан нөхдүүд яаж ийгээд хуурамч диплом олоод авдаг аж. Өнөөх диплом нь Яамны  бүртгэлийн санд бүртгэгдээгүй байдаг гэнэ.

Манай аймагт хуурамч диплом худалддаг, зуучилдаг сүлжээ нэг хэсэг их хөгжиж байсан. Бүр тодорхой үнэ ханштай. Улсын сургууль бол нэлээн хэдэн сая төгрөг, хувийнх бол арай бага ч гэх юм уу. Хуурамч дипломны асуудал дан ганц боловсролын салбарт байдаг гэж ойлгож болохгүй. Манай нийгмийн бүхий л салбарт байдаг. Иймээс үүнийг цэгцлэх, нэг тийш нь болгох асуудлыг гаргаж ирсэн Л.Энх-Амгалан сайдад иргэд талархаж байна. Цаашдаа боловсролын тогтолцооны асуудлыг үндсээр нь эргэж харахгүй бол манай нийгэм дээд сургуулийн дипломтой худалдагч, магистр зэрэгтэй жолооч нарыг бэлтгэж байна. Бүр сүүлдээ лангууны эзэд, наймаачид “Худалдагч ажилд авна. Тавигдах шаардлага: Ямар нэгэн дээд сургууль төгссөн байх” гэсэн зарыг сошиал сүлжээнд тавьдаг болжээ.