Орхон аймгийн Баян-Өндөр сумын томоохон багуудын нэг нь Цагаанчулуут. Хөрсөн доороо ядуу агуулга бүхий зэсийн томоохон ордтой гэвэл зарим нь итгэхгүй  дээ. Өнөөдрийн байдлаар түүнийг авч ашиглах боломжгүй учраас Цагаанчулуутынхан зэсэн дээр амьдарч байгаа  хэрэг. Аймаг, орон нутгийн удирдлагаас энэ багийн 11.9 га газрыг Гэр хорооллыг дахин төлөвлөн барилгажуулах чиглэлээр ажиллаж байна. Тэгээд ч өнөөдөр Цагаанчулуут багт Монголын хаана ч байхгүй томоохон бүтээн байгуулалт болох Орон сууцны “Их хаадын цуваа” хороолол сүндэрлэж байгаа.

Харин төрийн зүгээс Гэр хорооллыг дахин төлөвлөн барилгажуулах чиглэлээр олон жил ярьж хэлсэн зүйлийг ажил хэрэг болгохоор Цагаанчулуут багт бас нэгэн их бүтээн байгуулалтыг өрнүүлэхээр эхний  ажлыг гараанаас нь гаргаад байгаа. 

“Цагаанчулуут багийн 49-53 дугаар гудамжны гэр хорооллын газрыг дахин төлөвлөн барилгажуулах” гэсэн албан ёсны нэртэй төсөл гараанаас гарч ажил хэрэг болсноор Эрдэнэт жинхэнэ утгаараа Хот болоход илүү түлхэц болно. Энэ төслийг хэрэгжүүлэхийн тулд ХББЗА-ныхан иргэдтэйгээ илүү ойр, тулж ажилласан байна. Тус байгууллагаас иргэдийн 85 хувийг нь судалгаанд хамруулж, 70 нэгж талбарын газар өмчлөгчийн хүсэлтийг хүлээн авчээ. Судалгаанаас харвал дахин төлөвлөлтийг дэмжихгүй гэсэн нэг ч иргэн гараагүй байна.  Харин дахин төлөвлөлтөд хамрагдахын тулд нэгж талбар газраа бэлэн мөнгөөр солих сонирхолтой 15 өрх гарчээ. 49-53 дугаар гудамжны оршин суугч 55 өрх, айл газраа орон сууцаар солих хүсэлтээ илэрхийлсэн нь Гэр хорооллын газрыг дахин төлөвлөн иргэдийг орон сууцжуулах шаардлага амьдралд бодитой байгаагийн хамгийн тод илэрхийлэл нь болж байна. Төслийг хэрэгжүүлэхийн тулд дараахь арга хэмжээ авахаар мэргэжлийн байгууллага төлөвлөн ажиллаж байна. Үүнд,

*** Төсөл хэрэгжүүлэгчийг сонгон шалгаруулах Үнэлгээний хороо байгуулжээ.

*** Төсөл хэрэгжүүлэгчийг сонгон шалгаруулах Тендэрийг зарласан байна. Үүний дараа

*** Төр-Иргэн-Төсөл хэрэгжүүлэгч нар Гурван талт гэрээ байгуулах юм. Үүнийг хийхийн тулд ХББЗА судалгааны  ажлууд хийж эхэлжээ. Ингээд эцэст нь Баян-Өндөр сумын Цагаанчулуут багт “Цагаанчулуут багийн 49-53 дугаар гудамжны гэр хорооллын газрыг дахин төлөвлөн барилгажуулах” гэсэн албан ёсны нэртэй төсөл хэрэгжин үр дүнд хүрэх юм байна.