Орхон аймгийн Засаг даргын хэрэгжүүлэгч агентлаг ХББЗА ОНӨААТҮГ-ын дарга, Эрдэнэт хотын Ерөнхий архитектор Ц.Баяржаргалаас дахин төлөвлөлтийн хүрээнд хийгдэж байгаа ажлуудын нэг болох Уурхайчин багт байсан хуучин гараашийг буулгаж байгаа ажлын явцын талаар тодрууллаа.

-Уурхайчин багийн нутагт 1.3 га газарт гарааш чөлөөлөх ажил хийгдэж байгаа. Ажлын явц ямар байна вэ?

- Ууурхайчин багийн нутаг Эрдэнэтчүүдийн сайн мэдэх “Танил” төвийн урд байрлах 100 гаруй гараашийг буулгаж, барилгажуулах ажил, төсөл эхэлсэн. Төслийн хэрэгжүүлэгчээр “Таван хан” компани шалгарсан. Өөрөөр хэлбэл, төсөл хэрэгжүүлэгч “Таван хан” компани гарааш чөлөөлснөөр ямар бүтээн байгуулалт хийх тухайгаа иргэдэд, гарааш эзэмшигчдэд танилцуулж байна.

-Хэдэн давхар, хэдэн айлын орон сууц баригдах вэ?

-Нийтдээ 160 айлын орон сууц байна. Нэгээс зургаан давхар хүртлээ худалдаа, үйлчилгээ, оффисын зориулалттай барилга, байгууламж байна. Мөн доороо авто зогсоолтой байхаар төлөвлөсөн байгаа.

-Хэдэн блок барилга байх вэ?

-Яг одоогоор барилгын эцсийн зураг батлагдаагүй байгаа. Ер нь төлөвлөснөөр 160 айлын орон сууц байна гэж тооцсон.

-Нийт хэдэн гарааш энэ байршилд байсан бэ?

-Нийтдээ 118 гарааш байсан. Эдгээрээс 62 иргэний 72 гарааш нь албан ёсны зөвшөөрөлтэй, гэрчилгээтэй, гэрчилгээний хугацаа дуусаагүй байсан. Харин 10 гарааш нь гэрчилгээтэй боловч хугацаа нь дууссан байсан. Үлдсэн 36 гарааш нь ямар нэгэн зөвшөөрөлгүй, гэрчилгээ гараагүй байсан.

-Төсөл хэрэгжүүлэгчийн хувьд албан ёсны гэрээ контрактаа байгуулсан уу?

- Төсөл хэрэгжүүлэгч “Таван хан” компани, аймгийн Засаг дарга, гарааш эзэмшигч гэсэн 3 талт гэрээ байгуулаад байгаа. Гэрээ байгуулсаны үндсэн дээр газар чөлөөлөх ажил хийж байгаа. Өнөөдрийн байдлаар 14 гараашийн хаалга чөлөөлөгдөөгүй байгаа. Бусдынхыг нь чөлөөлөөд байгаа.

-Уурхайчин багийн нутагт гарааш чөлөөлж байгаа энэ талбар чинь Дахин төлөвлөлтийн хүрээнд хийж байгаа ажил мөн үү. Энэ хаврын зөвлөгөөний үр дүнд ажил хэрэг болж байгаа зүйл гэж ойлгож болох уу?

-Яг зөв, та сая хэллээ. Энэ оны дөрөвдүгээр сарын 1-нд “Дахин төлөвлөн баригажуулах, дэд бүтэцжүүлэх төслүүд” улсын анхдугаар зөвлөгөөнийг манай аймаг зохион байгуулсан. Барилга, хот байгуулалтын яам бусад 6 аймаг, орон нутагтай хамтран зохион байгуулсан тэрхүү зөвлөгөөн дээр манай аймгийн хувьд “Уурхайчин багийн нутагт 1.3 га газарт дөхин төлөвлөлт хийн барилгажуулах төсөл”-ийг танилцуулсан. Энэхүү 118 гараашийг буулган хийж байгаа 160 айлын 10 давхар орон сууцны барилга барих ажил бол таны хэлээд байгаа өнгөрөгч хаврын зөвлөгөөний хүрээнд хийж байгаа ажил мөн.

-Хотын өнгө үзэмж, тохижилтын талаасаа харахад үнэхээр тэр хавийн гарааш хэцүү л дээ. Урдуур нь А1001 улсын чанартай авто зам явдаг. Хотын төвийн нэг хэсэг балгас шиг л харагддаг. Одоо дахин төлөвлөлтийн хүрээнд барилгажсанаар сайхан болох нь?

-Тийм ээ, үнэхээр хотын өнгө үзэмж, дайран өнгөрч байгаа гадна, дотны хүмүүсийн нүдэн дээр ил байдаг газар. Энэхүү 118 гараашийг буулгаж дахин төлөвлөж барилгажуулсанаар хотын өнгө үзэмжид ч нөлөөлнө. Дээр нь хамгийн гол нь энэхүү 118 гарааш эзэмшигчдийн хувьд тохилог, дулаан, тав тухтай гарааштай болно. 10 давхар 160 айлын оршин суугчдын хувьд ая тух талаасаа бусдаас давуу талтай гэж харж байгаа. Төсөл хэрэгжүүлэгчид ч энэ мэт давуу талыг тооцон судалсны үндсэн дээр төслийн сонгон шалгаруулалтад орж ирсэн.