Аймгийн ЗДТГ-ын Орон нутгийн өмчийн газрын хувьд Орхон аймгийн өмчид бүртгэлтэй бүх байгууллага, өмч хөрөнгөд хяналт тавьдаг. Үүнд байшин барилгаас эхлээд, газар, орон сууц, хаалга цонх гээд олон өмч эднийд данс тооцоотой, бүртгэлтэй байдаг. Мөн тус байгууллагынхан жил бүр өмч хөрөнгийнхөө судалгааг хийж, 4 жилд нэг удаа улсын хэмжээний тооллогод хамруулахаас гадна ашиглах боломжгүй зүйлийг хэрхэн шийдэх талаарх асуудлыг боловсруулж аймгийн Засаг дарга болон Засаг даргын зөвлөлийн хуралд танилцуулж улмаар Орон нутгийн Өмчийн эзэн болох аймгийн ИТХ-д оруулж асуудлыг шийдвэрлүүлдэг. Тухайлбал, аймгийн цагдаагийн газар, БОЭТ, Өрхийн эмнэлгүүдэд ашиглагдаж байгаад элэгдлийн хугацаа нь дууссан, дахин ашиглах боломжгүй болсон автомашиныг хүртэл нэгбүрчлэн бүртгэж дуудлага худалдаагаар худалдан борлуулах зөвшөөрлийг аймгийн ИТХ-аас авдаг. Түүний дараа Дуудлага худалдаа зохион байгуулж түүний үндсэн дээр йамаг, орон нутагт тодорхой хэмжээний орлого төвлөрүүлдэг.

Аймгийн Орон нутгийн өмчийн газраас  өнгөрөгч хавраас эхлэн суурт судалгаа явуулж орон нутгийн өмчид бүртгэлтэй ч ашиглагдахгүй байгаа барилга, байгууламжийн судалгааг гаргажээ. Үүний дагуу аймгийн Засаг даргаас Захирамж гарган А.Түвшинжаргал даргаар ахлуулсан ажлын хэсэг байгуулсан байна. А.Түвшинжаргал даргатай ажлын хэсэгт Орон нутгийн өмчийнхөн ч багтаж данс тооцоонд бүртгэлтэй ч ашиглагдахгүй байгаа барилга, байгууламжтай нэгбүрчлэн танилцаж, газар дээр нь ажиллан судалжээ.

Аймгийн Засаг даргын Захирамжид заасны дагуу Ажлын хэсгийнхэн орон нутгийн өмчид бүртгэлтэй ч ашиглагдахгүй байгаа барилга, байгууламжийг барилга, байгууламжийн тоог нэгбүрчлэн гарган, цаашид хэрхэн талаар санал боловсруулж, аймгийн Засаг даргын Зөвлөлд оруулахаар болсон байна.