Аймгийн Засаг даргын захирамжаар А.Түвшинжаргал даргаар ахлуулсан “Орон нутгийн өмчид бүртгэлтэй ч ашиглагдахгүй байгаа барилга, байгууламжийн судалгааг гарган санал боловсруулах” Ажлын хэсгийг байгуулсан. Аймгийн Орон нутгийн өмчийн албанаас судлан гаргаж ирсэн нэр бүхий 16 байршил дахь барилга, байгууламжийг хэрхэн тухай асуудлыг боловсруулж санал оруулж ирэх Ажлын хэсгийн ахлагч А.Түвшинжаргалаас аймгийн Засаг даргын Зөвлөлийн хурлын үеэр тодруулга авлаа. Тэрбээр,

“Орхон аймгийн Засаг даргын захирамжаар орон нутгийн өмчид бүртгэлтэй ч ашиглагдахгүй байгаа барилга, байгууламжийн бүртгэл, судалгааг гарган ирж танилцуулах үүрэгтэй Ажлын хэсгийг миний бие ахлан ажилласан. Захирамжийн дагуу манай ажлын хэсэгт инженерийн байгууламжийн зөвшөөрөл өгдөг, эрх бүхий хүмүүс орж ажилласан. Тухайлбал, “Эрдэнэт-Булганы цахилгаан түгээх”-ийн ерөнхий инженер, Эрдэнэтийн дулааны цахилгаан станц, “Эрдэнэт-Ус”-ын ерөнхий инженерүүд багтсан. Мөн мэдээлэл холбоо, сүлжээнйи газрын ерөнхий инженер ч багтаж ажилласан. Ажлын хэсгийнхэн дээрх 16 объект дээр нэгбүрчлэн газар дээр нь очиж ажиллан хэмжилт хийсэн. Үүнийхээ хүрээнд Газрын харилцаа, барилга хот байгуулалтын газраас дээрх газруудад хэрхэн барилгажилт хийж болох тухай судалгааг гаргууллаа. Ингэхэд 4 байршил, түүний газар дээр 5-9 давхар барилга барих техникийн шийдэл бүрдсэн байгаа учраас эдгээрийг барилгажуулах саналыг гаргаж байгаа. Үүнийг хийхдээ Төр хувийн хэвшлийн хамтын ажиллагааны түншлэлийн журмын хүрээнд тодорхой хэмжээнд хувийн хэвшилдээ өгч барилга бариулна. Түүнийхээ тодорхой хувийг орон нутгийн бүртгэлд авч төрийн албан хаагч болон бусад иргэддээ түрээслүүлэх хэлбэрээр ашиглуулахаар саналаа гаргаад аймгийн Засаг даргын Зөвлөлийн хуралд оруулаад байна.

Дараагийн 4 барилгын хувьд мэдээж үйл ажиллагаа нь явагдаад тогтмолжсон, түрээсээ байнга төлдөг, сайн түншлэлийн харилцаатай хувийн хэвшлийн байгууллагуудаа дэмжих үүднээс хэвээр үлдээхээр болж байгаа. Үлдсэн барилгуудыг мэргэжлийн үнэлгээний байгууллагуудаар үнэлгээ хийлгэж дуудлага худалдаагаар зарах саналыг Ажлын хэсгийнхэн оруулсан. Аймгийн Засаг даргын Зөвлөлийн гишүүд ч энэ саналыг дэмжиж байгаа. Энэ ажил бол Орон нутгийн өмчийн ашиглалтыг сайжруулахын зэрэгцээ иргэдэд боломж олгох үүднээс хийж хэрэгжүүлсэн зүйл. Ер нь өмчийн бүртгэлд байгаа ашиглагдахгүй, эдэлгээ хугацаа нь дууссан, зарагдаж борлогддоггүй өмч хөрөнгө их байдаг. Үүнийг цэгцлэх талаас Орон нутгийн өмчийн газар болон холбогдох албад эхнээсээ шат дараатай арга хэмжээ аваад ажиллаж байна” гэлээ.