Аймгийн ИТХ-ын Зөвлөлийн IX хуралдаанд “Олон нийтийн цагдаагийн тоог тогтоох тухай” асуудлыг авч хэлэлцэв. Аймгийн Цагдаагийн газрын дарга, цагдаагийн хурандаа С.Цэрэнсамбуу  мэдээллээс харвал 2013 оны 7 дугаар сарын 5-ний өдөр УИХ-аас баталсан “Цагдаагийн албаны тухай хууль”-ийн 5 дугаар бүлэгт “Олон нийтэд түшиглэсэн цагдаагийн үйл ажиллагаа”-ны 24 дүгээр зүйлд “Олон нийтийн цагдаагийн ажилтан” байна гэж заасан ажээ. Өнөөдрийн байдлаар Орхон аймгийн Цагдаагийн газарт Олон нийтийн цагдаагийн орон тоог 40-өөр баталсан байна.  Гэвч бодит байдал дээр аймгийн Цагдаагийн газарт өнөөдрийн байдлаар 26 олон нийтийн цагдаа ажилладаг аж. Тэдний 19 нь эрэгтэй бол 7 нь эмэгтэй. Боловсролын хувьд 4 нь дээд 22 нь бүрэн дунд боловсролтой байна. Дээрх 26 олон нийтийн цагдаагийн 17 нь Нийтийн хэв журам хамгаалах тусагт, 3 нь Замын цагдаагийн тасагт, Шуурхай удирдлагын тасагт 2, Жаргалант суманд 4 ажилладаг аж.

Аймгийн ИТХ-ын 2021 оны арваннэгдүгээр сарын 29-ний өдрийн 55 дугаар тогтоолоор Олон нийтийн цагдаагийн урамшууллыг 503 мянган төгрөг, орон тоог 40 байхаар тогтоожээ. Гэвч бопдит байдал дээр цалин бага гэдэг шалтгаанаар олон нийтийн цагдаад ажиллах иргэн олдохгүй, ажиллаж байгаа иргэдийн 10-15 нь орох гарах хөдөлгөөн хийдэг байна. Иймд Орхон аймгийн Цагдаагийн газрын дарга С.Цэрэнсамбуу хувьд 2023 оны нэгдүгээр сарын 1-нээс эхлэн хөдөлмөрийн хөлсний доод хэмжээ өөрчлөгдсөн, нэг цагийн хөлс 3273 төгрөг 80 мөнгө болж цалингийн доод хэмжээ 550 мянган төгрөг болж байгаа учраас аймгийн ИТХ-аас баталсан Урамшууллын мөнгөн дүнгийн хэмжээнд цалингийн сангаа багтаан орон тоогоо 30 болгон бууруулахаар санал оруулж иржээ. Мөн урамшууллын хэмжээг 167 мянгаар нэмэгдүүлж нийт 670 мянган төгрөгт хүргэснээр Олон нийтийн цагдаа нар гар дээрээ 550 мянган төгрөгийн урамшуулал авах боломж бүрдэж байгааг Зөвлөлийн гишүүдэд танилцуулав. Ийм арга хэмжээ авахгүй бол Олон нийтийн цагдаагаар тогтвор суурьшилтай ажиллах иргэн олдохгүй байгаа, тэтгэвэрийн насны хүмүүсийг гуйх хэмжээнд хүрч байгааг Цагдаагийн дарга танилцуулсан.

Зөвлөлийн гишүүд нөхцөл байдалтай танилцаад Олон нийтийн цагдаагийн ажилтны цалин, орон тоог дахин нягталж оруулж ирэхээр тогтлоо.