Өнгөрөгч амралтын өдрүүдэд цахим орчинд нэгэн хувийн цэцэрлэгийн багш бяцхан хүүхдийг “унтахгүй байна” гэдэг шалтгаанаар хацар дээр нь алгадаж буй бичлэг цацагдсан. Энэ бол байж болошгүй, зөвтгөхийн аргагүй буруутай үйлдэл. Сургууль, цэцэрлэгийн орчинд хүүхдийн эсрэг гэмт хэрэг мэр сар гарсаар байгаа. Нийгмээрээ, Эрдэнэт даяараа дээрх бичлэгийг жигшин зэвүүцэж байгаа ч Цэцэрлэгийн удирдлага, тухайн байгууллагаас “Уучлаарай” ч гэж хэлүүлж чадахгүй байгаа өнөөдрийн нөхцөл байдлыг яалтай. Хүүхэд алгадсан багшийг ажлаас халаад, бүр цаашилбал хууль хяналтын байгууллагад шалгуулахаар өгөөд Хүүхдийн хүчирхийллийн эсрэг энэ мэт зарим “кэйс”-ийг нам болгох уу. Арай л өөр арга хэмжээ авч, шаардлагаа өндөржүүлмээр, нөгөө тал нь ёс суртахууны хувьд эцэг, эхчүүдээс Хүлцэл өчиж сурмаар байна. Эрдэнэтчүүд бид чинь арванхоёрдугаар сарын 20-н хүртэл Соёлыг түгээж, Хотын соёлыг нутагшуулахын тулд  “Хувийн соёл-Байгууллагын соёл-Хотын соёл”  аяныг өрнүүлж байгаа билээ. Соёлыг түгээж байгаа сард сургуулийн өмнөх боловсролын байгууллагад хүүхдийн эрүүл мэндийн эсрэг гэмт хэрэг ч гэж хэлж болох үйлдэл гарсан нь яав ч зөвтгөх үйлдэл биш. Адаглаад албан байгууллагын дарга нь эцэг, эхчүүдээс “Уучлал” хүсдэг, “Хүлцэл” өчдөг болчихвол Хотын соёлд бага ч гэсэн тус нэмэр болно доо.