“Иргэдийн оролцоо-Төлөөлөгчийн манлайл-Төрийн үйлчилгээ” өдөрлөг Баян-Өндөр сумын Спорт зааланд арваннэгдүгээр сарын 23-нд болсон. Энэ үеэр Баян-Өндөр сумын Засаг дарга, Баянцагаан багаас аймгийн ИТХ-д сонгогдсон төлөөлөгч Б.Баасансүрэнгээс сэтгэгдлийг нь сонслоо.

Б.Баасансүрэн: “Иргэдийн оролцоо-Төлөөлөгчийн манлайлал-Төрийн үйлчилгээ” нэгдсэн арга хэмжээ нь цаг үеэ олсон өдөрлөг болж байна. Төлөөлөгч хүн аймаг, орон нутгийн Иргэдийн хурлыг дэмжиж, санал гаргаж, тухайн гаргасан саналыг ажил хэрэг болгож, төсөв хөрөнгө шийдвэрлэхийг зорьдог. Энэхүү өдөрлөгт Баянцагаан багийн Засаг даргын Ажлын алба, болон иргэдийн төлөөлал ирж тулгамдаж буй асуудал болон цаашид хэрэгжүүлэх ажлын саналыг нээлттэй хүргэж байна. 2021 онд Баянцагаан багийн айл өрхөөс орон нутгийн хөгжлийн сангаар юу хийвэл болох, цаашид анхаарах зүйлийн талаар 75 хувийн санал асуулга авсан. Төлөвлөсөн ажлууд 90 орчим хувьтай биелсэн. Баянцагаан багт гэр хороолол  болон байшин хороолол хосолсон “Өнөр” хотхон байгуулагдсан. Тус хотхон нь 13 жилийн хугацаанд хүүхдийн тоглоомын талбай, амрах чөлөөт цагийн талбайгүй байсан. Энэ асуудлыг аймгийн хөрөнгө оруулалтаар шийдвэрлэж, ахмад настан, хүүхэд багачууд, залуус чөлөөт цагаа зөв боловсон өнгөрүүлэх боломжтой болсон. Мөн сайжруулсан  шороон замын ажил болон  сүүлийн 9 жилийн хугацаанд инженерийн дэд бүтэцтэй хөрөнгө оруулалттай ажлуудыг хийсэн. 2021 онд энэхүү ажлыг үргэлжлүүлэн Хашаандаа сайхан амьдрах боломж нөхцөлийг бүрдүүлж тэрбум орчим төгрөгийг аймгийн Иргэдийн хурлаар шийдүүлж, үр дүнтэй явж байна. Дэлхий нийтийн хямрал болон цементын хомсдолтой холбоотой энэ ажил удаашралттай явж байсан ч тухайн байгууллагыг шахаж шаардаж ажлын гүйцэтгэлийг 90 хувьтай явуулж байна. Ирэх хавар энэ ажлыг гүйцэтгүүлж, иргэдийг халуун ус, дулаантай холбох ажлуудыг зохион байгуулна. Үүнээс хамаарахгүйгээр  иргэд маань инженерийн шугам сүлжээгээ татаад орсон. 2023 оны төсөв дээр Баянцагаан багт харьяатай Вокзалын СӨХ-ыг засварлана. Үүнд Вокзалын 3 ,4 дүгээр байр СӨХ байдаггүй учир цэвэрлэгээ үйлчилгээ хийх нөхцөл бүрдээгүй  учир иргэдийн ая тухай амьдрах нөхцөл боломжийг бүрдүүлэх үүднээс  орцыг нь засварлах, цонх солих, гэрэлтүүлэг нэмэх ажлыг зохион байгуулна. Мөн байрны хана дээвэр, таазыг засна. Гэр хорооллын айл өрхүүдийн хаалгыг нь ч будах боломж байдаггүй тул  2023 онд Баянцагаан багт жишиг гудамж тохижуулах талаар аймгийн төсөвт тодорхой мөнгийг тавьж байгаа. Энэхүү ажил нь Иргэдийн бүлэг, хоршоо холбоодыг дэмжих жилийн ажлын хүрээнд иргэн төр хоёрын уялдаа холбоог сайжруулах ажил болох юм.