Орхон аймгийн өвөлжилтийн байдал одоогийн байдлаар хүндрэл гараагүй байна. Жилийн эцсийн мал тооллогын дүнгээр Орхон аймаг өнгөрсөн оноос 10,1 хувиар малын тоо толгой өссөн үзүүлэлттэй гарчээ. Энэ өвөл аймгийн хэмжээнд 1350 малчин өрх дээр 169,9 мянган толгой мал тоологдож, үүнээс үхэр 27,5 мянга, адуу 17,3 мянга, хонь 66,2 мянга, ямаа 58,2 мянган толгой тоологдсон байна.

Малчин айл өрхүүд энэ намар хадлан тэжээлээ боломжийн хэмжээнд бэлтгэж авсан гэж албаны хүн ярилаа. Аймгийн өвсний нөөцөнд 218 тонн өвс, 73,4 тонн тэжээл нөөцөлсөн. Малчдын хүсэлтээр нөөцнөөс өвс тэжээл олгох ажлыг 1 сараас эхэлнэ. Өнгөрсөн 11,12-р сард 12 удаа цас орсон.

Орхон аймаг газар нутгийн багтаамж, бэлчээрийн нутаг багатай ч өнгөрсөн жилээс малын тоо толгой өсч, 170 мянга орчим малтай болоод байна. Үүнээс хонь 66 мянгад хүрсэн нь таван хошуу малаас хамгийн өндөр өссөн үзүүлэлттэй байна.