Монгол Улсын байт харвааны 15 дахь удаагийн заалны улсын аварга шалгаруулах тэмцээн энэ сарын 23-аас 26-ны хооронд Орхон аймагт болох гэж байна.  
Тэмцээнийг аймгийн Засаг даргын Тамгын газар, Монголын байт харвааны холбоотой хамтран зохион байгуулах бөгөөд аймгийн Засаг даргын захирамжаар ажлын хэсэг байгуулагдаж бэлтгэл ажилдаа ороод байгаа юм. Ажлын хэсгийг аймгийн Засаг даргын орлогч А.Түвшинжаргал ахалж байна. 
    Байт харвааны заалны Улсын аварга шалгаруулах тэмцээн энэ жил Рекувр болон компаунд төрлүүдээр  U14, U18, U21, насанд хүрэгчид гэсэн ангилалд болно.  “Рекувр” төрөлд нас тус бүрд эрэгтэй эмэгтэй хувийн шигшээ харваа, насны ангилал тус бүр эрэгтэй эмэгтэй багийн харваа явах бол “компаунд” төрөлд эрэгтэй эмэгтэй хувийн харваа, эрэгтэй багийн харваа төрөлд тамирчид цэц мэргэнээ сорино.  
      Өнөөдрийн байдлаар нийт 20 гаруй байгууллага, клубын 295 тамирчин бүртгүүлээд байгаа ажээ.  Бүртгэл 2-р сарын 27-нд эхэлсэн бөгөөд энэ сарын 13-ны өдөр хаагдах юм. 
Энэ жилийн хувьд өмнөх жилүүдээс харьцангуй олон тамирчин оролцох урьдчилсан статистик гарч байгаа тул Монголын байт харвааны холбооны зүгээс тэмцээний үеэр тамирчиддаа чиглэсэн сургалтыг явуулахаар төлөвлөжээ. Тэмцээний техникийн зөвлөгөөн энэ сарын 22-ны өдөр 17:00 цагт Орхон аймагт болно.