Монгол Улсын 3 дахь том хот Эрдэнэт хот, Орхон аймаг нь өрсөлдөх чадвар, эдийн засгийн чадамжаараа улсдаа эхний гуравт, зам харилцаа, дэд бүтэц, гадаад, дотоод харилцаа, нийгмийн үйлчилгээний чанар, хүртээмжээрээ сүүлийн 10 жил тэргүүлж буй.  
Бүсийн оношилгоо, эмчилгээний төв нь сүүлийн үед хүнд амд зонхилон тохиолдож буй зүрх судас, тархины цус харвалт болон зүрхний шигдээс өвчнийг эмчлэх, оношлох зорилгоор ”Тархины цус харвалт, зүрхний шигдээс” –ний нэгжийг байгуулж судсан дотуурх мэс заслыг орон нутагтаа хөгжүүлж мэргэжлийн эмч, сувилагч, техникчдийг бэлтгэн дэвшилтэт технологийг ашиглаж эхлээд байна. 

    “Siemens” брэндийн ангиографийн аппартыг 2021 онд суурилуулан өнөөдрийн байдлаар 330 хүнд мэс ажилбар хийсэн. Тухайлбал,  зүрхний титэм судсан дотуурх оношилгоо, эмчилгээ, Элэгний хавдрын тэжээгч судас бөглөх эмчилгээ, зүрхний баруун тосгуурт түннель гуурс суулгах, авах, тархины судасны катетрт оношилгоог хийжээ.   Бүсийн оношилгоо, эмчилгээний төв нь цаашид төв, хангайн бүсдээ тархины цус харвалт, зүрхний шигдээсийг эмчлэх гол төв бааз нь болж эрүүл мэндийн дотоод аялал жуулчлалыг хөгжүүлэхээр зорьж байна. 

Иймд яаралтай түргэн тусламж шаардлагатай өвчтөнг агаараар тээвэрлэх онгоцны буудал,  олон улсын эмнэлэгүүдтэй хамтран  алсын зайн оношилгооны төв байгуулахаар ажиллаж байна.  

Эрүүл мэндийг дэмжих төвийг урьдчилан сэргийлэх, эрт илрүүлгийн оношилгоо, эмчилгээний төв болгохоор зорьж байна 

Аливаа улс орон эрүүл мэндийн аялал жуулчлалын салбараа хөгжүүлэхдээ урьдчилан сэргийлэх үзлэг, эрт илрүүлгийн оношилгоо, үйлчилгээний чанар, хүртээмжээ нэмэгдүүлдэг. Иймд Орхон аймаг “Эрүүл мэндийг дэмжих төв”-ийг шинээр байгуулж 30 гаруй тасгаараа дамжуулан Булган, Сэлэнгэ, Хөвсгөл аймгийн иргэдэд үйлчилж цаашид урьдчилан сэргийлэх, эрт илрүүлгийн оношилгоо, эмчилгээний төв болохоор зорьж байна.

"Эрдэнэт медикал"  эмнэлэг дэлхийн жишигт нийцсэн 1300 гаруй эмнэлгийн үйлчилгээ үзүүлж  байна 

“Эрдэнэт медикал” эмнэлэг нь олон улсын стандартад нийцсэн, дэвшилтэт тоног төхөөрөмжөөр  дэлхийн жишигт нийцсэн 1300 гаруй эмнэлгийн үйлчилгээ үзүүлж  байна.  Тус эмнэлэг хөдөө орон нутагт хийгддэггүй MRI, CT болон нарийвчилсан шинжилгээ, оношилгоо, эмчилгээ хийдгээрээ давуу талтай юм. Амбулатори, лаборатори,  дүрс оношилгоо,  мэс засал, дуран, зэрэг 9 тасагт 180 гаруй эмч, сувилагч, эмнэлгийн тусгай мэргэжилтэн ажиллаж байна. Соронзон резонанст томографи /MRI/, Компьютерт томографи /СТ/, Маммографи, Ангиографи, Хэт авиа, Рентген зэрэг дүрс оношилгооны тасаг нь сүүлийн үеийн дэвшилтэт технологийг ашиглан зөвхөн 3 дахь шатлалын эмнэлэгт хийгддэг мэс засал, оношилгоо, эмчилгээ хийж байна. Мөн нүдний болор солих хагалгааг орон нутагтаа анх удаа хийгээд байна. 

“Эрдэнэт медикал” эмнэлэг нь эрүүл мэндийн урьдчилан сэргийлэх үзлэгийг дотоод аялал жуулчлалтай хослуулан Эмнэлэг-Амралт, сувилал- Хотын аялал  гэсэн тусгай хөтөлбөр гарган ажиллаж үйлчлүүлэгчдэдээ Япон улсын Кенко аргачлалаар хийдэг урьдчилан сэргийлэх үзлэгт хамруулж, Сэлэнгэ амралтын бааз, Эрдэнэт үйлдвэр, Эрдэнэт хоттой танилцуулах юм. Тус эмнэлэг нь цаашид хэвтүүлэн эмчлэх эмнэлэг, ахмадын асаргаа, сувилгааны төв, диабетийн төвийг нээж, цээжний хөндийн хавдрын мэс заслыг нэвтрүүлэхээр зорилт тавин ажиллаж байна.  

“Баян-Өндөр мед” эмнэлэг хөдөө орон нутгаас анх удаа үргүйдлийг эмчилж  байна 
Баян-Өндөр мед эмнэлэг нь эх барих, эмэгтэйчүүд, нөхөн үржихүйн чиглэлээр ажилладаг бөгөөд хөдөө орон нутгаас анх удаа үргүйдлийг эмчилж эхлээд байна. Ингэснээр зөвхөн Улаанбаатар хот болон гадны улсад эмчлүүлэх иргэдийн урсгал Орхон аймагт төвлөрч цаг хугацаа, эдийн засгаа хэмнэх боломж бүрдэж байгаа  юм.  Эмэгтэйчүүдийн үргүйдлийг эмчлэх зорилгоор Улаанбаатар хотын RMC эмнэлэгтэй хамтран ажиллаж өндгөн эсийг тодорхойлох болон эмэгтэйчүүдийн дааврын шинжилгээг орон нутагтаа хийж эхэлснээр дотоодын үйлчлүүлэгчдийн тоо нэмэгдэж бүс нутагтаа төрөх, эмэгтэйчүүдийн эмнэлгээрээ дагнан ажиллах боломжтой юм. 

БНСУ-ын Дэгү хотын “Эрүүл мэндийн аялалыг дэмжих төв” –тэй хамтран ажиллана 

Орхон аймаг эрүүл мэндийн салбартаа нийт хөрөнгө оруулалтынхаа дийлэнх хувийг зориулж, дэвшилтэт технологи, эмчилгээний аргачлал, эрүүл мэндийн нэг цэгийн үйлчилгээ, чадварлаг хүний нөөц, хүртээмжтэй үйлчилгээгээрээ Монгол Улсдаа тэргүүлдэг юм. Гадаад харилцаа, хамтын ажиллагаагаа өргөжүүлж эмч нарын баг олон улсад туршлага судлах, шинэ арга, аргачлалыг орон нутагтаа нэвтрүүлэх, эрүүл мэндийн аялал жуулчлалыг хөгжүүлэх зорилгоор Орхон аймаг БНСУ-ын Дэгү хотын “Эрүүл мэндийн аялалыг дэмжих төв” –тэй хамтран ажиллах “санамж бичиг” байгууллаа. 

Хоёр хотын хамтын ажиллагааны хүрээнд эрүүл мэндийн технологийн салбарт хамтран ажиллаж, мэдээлэл солилцох, Орхон аймгийн эмч, эмнэлгийн ажилтуудыг БНСУ-д чадавхижуулах, сургалтад хамруулна. 

Цаашид Бусаны их сургуулийн эмнэлэгтэй хамтран БОЭТ-д алсын зайн оношилгоо, эмчилгээ хийх, хүнд өвчтөнг алсын сайн телемедицин ашиглан эмнэлзүйн конференц болон оношилгоо, эмчилгээний зөвлөгөө авах, Орхон аймгийн Эрүүл мэндийн газартай хамтран ажиллах гэрээ байгуулах, Монгол Улсад эмчлэх боломжгүй хүнд өвчтэй Орхон аймгийн нэг иргэний мэс заслыг БНСУ-д үнэ төлбөргүй хийх юм. Мөн БОЭТ-өөс нэг эмч, IT инженерийг Бусаны эмнэлэгт ажиллууж,  цалинжуулах олон давуу тал бүрдэж байна.  

Мэдээллийн төв