“Эрдэнэт хотын болон Анхдагч, илгээлтийн эздийн өдөр” аймгийн удирдлагуудын урилгаар гаднын олон зочид төлөөлөгчид  Орхон аймагт зочилж ирсний нэг нь БНСУ-ын Дэгү хотын  Эрүүл мэндийн аялал жуулчлалын хөгжлийн хүрээлэнгийн Ерөнхий захирал Ким Сён Хо  тэргүүтэй албаныхан юм. Төлөөлөгчдийг өнөөдөр аймгийн ИТХ-ын дарга Д.Мөнхбат, Засаг даргын орлогч М.Түмэнжаргал  нар бусад албаны хүмүүсийн хамтаар   хүлээн авч уулзан, хамтын ажиллагааны талаар санал солилцлоо. 

     Орхон аймаг эрүүл мэндийн салбарын гадаад хамтын ажиллагаагаа өргөжүүлж, эмч, эмнэлгийн ажилтнуудаа олон улсад туршлага судлах, шинэ арга аргачлалыг нэвтрүүлэх чиглэлээр БНСУ-ын Дэгү хотын “Эрүүл мэндийн аялалыг дэмжих төв”-тэй хамтран ажиллах санамж бичгийг үзэглэсэн. 

Хамтын ажиллагааны хүрээнд эрүүл мэндийн технологийн салбарт мэдээлэл солилцон аймгийн эмч, эмнэлгийн ажилтнуудыг БНСУ-д чадавхжуулах, сургалтад хамруулж эхэлсэн билээ. 

Ноён Ким Сён Хо  “Дэгү хот эрүүл мэндийн тусламж үйлчилгээгээрээ улсдаа тэргүүлдэг хотуудын нэг. Эрүүл мэндийн салбарынхаа тэргүүлэх системийг Орхон аймагт нэвтрүүлж байгаад бид туйлын баяртай байгаа. Ирэх жилүүдэд хамтын ажиллагаагаа илүү өргөжүүлнэ гэдэгт найдаж байна. Солонгос-Монгол эмч хөтөлбөрийг хэрэгжүүлэхээр бид зорьж байгаа. Үүнд,  Орхон аймгийн эмч, эмнэлгийн ажилтнууд хамрагдах боломжтой” гэдгийг онцоллоо. 

Мэдээллийн төв