Банкийн Мягмарсүрэнд үнэхээр сэтгэл гутарлаа. Хувийн эрх ашгаа хойш нь тавьж, нам, энэ том бүтцийн ар дахь дэмжигчид, гишүүдээ бодоод яагаад буулт хийх ёс суртахуун түүнд байсангүй вэ. Түүнд намынхаа буянаар аймгийн нэгдүгээр хүн байсан дөрвөн жил бий. Ардчилсан намын нуруулаг туруулаг, боловсрол сайтай шижигнэсэн залуу төлөөлөгчдийнхөө дунд тэр буурь заах ёстой байсан. Анхдугаар хуралдаан дээр Б.Мягмарсүрэнгийн хэлсэн үг даацтай, жинтэй байсан. Сөрөг хүчнээр мөлхөж ядарсан АН-д түүн шиг улстөрч тун хэрэгтэй. Тэгсэн даргын санал хураалтад оролцохгүй гээд намаа хаяад, нэг суудлаар онгойтол үлдээгээд явчих юм. Яг л "Гарын таван хуруу" киноны Шагдар шиг хаалгаа зад өшиглөчихлөө. Тэр улс төрийн карьeриа ингээд дуусгачих шиг.

Ардын нам яаж ч тасарч байсан сүүлээ залгаад толгой нь цогнойх могой шиг  анхдугаар хуралдаанд Хурлын даргын суудлаа авч чадлаа. Д.Мөнхбат мэдрэмжтэй улстөрч, сийрэг толгойтой хүн. Өмнөх жилүүд шиг азаргалдаг цаг үе биш гэдгийг хашир "хандгай" сайн мэднэ. Б.Мягмарсүрэнг Хурлын даргад намын бүлэг нэрийг нь дэвшүүлээгүй ч тэр ханцуйн дотроо гараа чанга атгаад, хувийнхаа амбицыг хойш тавьсан бол жинхэнэ улс төрд чивчирсэн эр хар сур  болох байлаа. Олон нийт түүнийг ийм өнцгөөр дүгнэж байгаа. Харин залуу төлөөлөгчдөд ёс зүйн том сургамж боллоо, Б.Мягмарсүрэнгийн энэ удаагийн үйлдэл.