Аймгийн ИТХ-ын дэргэдэх Гэмт хэргээс урьдчилан сэргийлэх салбар зөвлөлөөс Эрдэнэт хотын хэмжээнд Замын хөдөлгөөний аюулгүй байдлын эсрэг гэмт хэргийн үзүүлэлт өндөр байгаад дүгнэлт хийж, “Ногоон гэрэл-Цагаан шугам” аяныг явуулсан. Хүүхдүүдэд замын хөдөлгөөнд аюулгүй оролцох дадлыг багаас нь хэвшүүлэхийг гол зорилгоо болгосон гэж зохион байгуулагчид нь ярьлаа. Д.Тунгалаг: Аймгийн ИТХ-ын Хуулийн хэлтсийн дарга -Аймгийн Гэмт хэргээс урьдчилан сэргийлэх зохицуулах зөвлөл 2023 онд аймгийн хэмжээнд гарч байгаа таван гэмт хэргийг бууруулах чиглэлээр дунд хугацааны бодлогын баримт бичгийг аймгийн ИТХ-аар батлуулсан. Эдгээр бодлогын баримт бичигт тусгагдсан нэг гэмт хэрэг нь Эрүүгийн хуулинд заасан Хөдөлгөөний аюулгүй байдал, ашиглалтын эсрэг гэмт хэрэг байгаа. Энэхүү гэмт хэргээс урьдчилан сэргийлэх чиглэлээр манай аймагт “Ногоон гэрэл-Цагаан шугам” аяныг зохион байгуулж байна. Уг үйл ажиллагаанд аймгийн Гэмт хэргээс урьдчилан сэргийлэх салбар зөвлөлийн гишүүд хамтран оролцож байна. Соён гэгээрүүлэх, нөлөөллийн ажил хийхээр төлөвлөөд байна. О.Ариунгэрэлт Аймгийн Боловсролын газрын дарга -“Ногоон гэрэл-Цагаан шугам”-ын хүрээнд сургуулиудад замын хөдөлгөөний соёлын талаар танилцуулга хийж, хүүхдээр дүн шинжилгээ өгүүлэх ажлыг зохион байгууллаа. Хүүхдэд зам тээврийн ослоос урьдчилан сэргийлэх талаар мэдлэгтэй болж авах, нөгөө талаар амьдралын хэв маягтаа гадаа зорчиж байхдаа, сургуульдаа ирж, буцахдаа замын хөдөлгөөний дүрмийг баримталдаг болохыг эзэмшүүлэхийг зорьж байна. Мөн эцэг эхчүүд хүүхдүүддээ эрсдэлээс урьдчилан сэргийлэхэд мэдлэг мэдээлэлтэй болоход чиглэж байна. Нийгэмд хандсан хандлага, гэр бүл доторх замын хөдөлгөөний зөв дадалтай болгохыг зорьж байна. Иймд энэ удаагийн ажилд Ерөнхий боловсролын сургуулиуд өргөн цар хүрээтэй оролцож, энэ сарын 13-24-ний өдрүүдэд сургууль дээр аяны хүрээнд таван чиглэлийн дагуу зохион байгууллаа. Аян үргэлжлээд дууссаны дараа хүүхдүүд замын хөдөлгөөний дүрмийн анхан шатны мэдэгдэхүүнтэй болоод амьдралын хэв маягтаа хэрэгжүүлж байвал гол үр дүн гарах юм. Н.Гансүх Мэдээлэл шуурхай удирдлагын төвийн дарга -Орхон аймгийн автозамын камержуулалт ямар түвшинд байгааг бид харж байна. Цаашид Гэмт хэргээс урьдчилан сэргийлэх салбар зөвлөлийн ажлын хүрээнд бид хотын доторх автозам болон автомашины урсгалуудыг цахимжуулах, камержуулалтыг нэмэгдүүлэхэд онцгой анхаарч ажиллана. “Ногоон гэрэл-Цагаан шугам” аяны хүрээнд дүрмээ биелүүлэн оролцохыг жолооч нартаа уриалж байна. Х.Одбаяр Аймгийн ЦГ-ын ЗЦТ-ийн дарга -Тээврийн хэрэгсэлтэй холбоотой гэмт хэрэг өнгөрсөн оноос 2,5 дахин өссөн үзүүлэлттэй байна. Яагаад өндөр гарч байна вэ гэхээр, Зөрчлийн тухай хуулинд нэмэлт өөрчлөлт орсонтой холбоотой согтуугаар тээврийн хэрэгсэл жолоодсон зөрчил гаргачихаад, дахин давтан эрүүгийн хуулиар зохицуулдаг болсон учир энэ тоо өндөр гарч байна. Зам тээврийн осол хэргийн улмаас таван хүн нас барсан байна. Эдгээр хүмүүсийн дөрөв нь явган зорчигч, нэг хүн унадаг дугуйгаар зорчиж байгаад зам тээврийн осолд өртөж, харамсалтайгаар амь насаа алдсан. Нийт зам тээврийн ослын улмаас гэмтсэн хүний тоо өмнөх оноос 30 хувиар буурсан. Зам тээврийн осолд 21 хүүхэд бэртэж гэмтсэн байна. Аймгийн хэмжээнд гарч байгаа зам тээврийн хэргийн шалтгаант нөхцөл байдлыг судлахад, орон сууцны хорооллын дундах замууд дээр ихэнх ослууд гарсан. Дөрвөн зорчигч амь насаа алдсан нь зохицуулдаггүй явган хүний гарц дээр явган хүн давуу эрхээ эдлэж чадаагүйгээс үүссэн. Жолооч нар явган хүний гарцан дээр явган зорчигчийг мөргөж, шүргэж амь нас, эрүүл мэндийг нь хохироосон. Иймд Мэдээлэл шуурхай удирдлагын төв дээр манай ажилтан ажиллаж, дээрх зөрчлийг гаргаж байгаа жолооч нарт анхааруулга өгөх, хариуцлага тооцох ажлыг хийж байна.