Орхон аймгийн орон нутгийн өмчид хүүхдийн “Янзага” зуслан бүртгэлтэй. Сүүлийн жилүүдэд зуслангийн засварын ажил он дамжин удааширсан шалтгаанаар бүрэн хэмжээгээр үйл ажиллагаа явуулаагүй. Харин өнөө жил зуслан 6-р сарын 25-наас хүүхдээ хүлээн авах гэж байгаа талаар аймгийн Хүүхэд гэр бүл хөгжил хамгааллын газрын Хүүхдийн хөгжил, оролцоо хариуцсан мэргэжилтэн М.Батжаргалаас тодрууллаа.

---Аймгийн Засаг дарга Б.Зоригтбаяр өнгөрсөн гуравдугаар сард “Янзага” зуслан дээр ажиллаж, засвар үйлчилгээний ерөнхий байдалтай танилцсан. 2024 оны орон нутгийн төсвөөс 900 гаруй сая төгрөгөөр зуслангийн засвар үйлчилгээг аравдугаар сард эхлүүлсэн. Одоо дөрвөн ширхэг байр нэмэлтээр зөөж тавьснаар долдугаар сарын 5-нд засварын ажил бүрэн дуусна.

---Одоо засварын ажил 90 хувьтай явж байна. Хүүхдийн амрах байр, гал тогооны засвар, клуб, бүжгийн талбайн засвар зэрэг шаардлагатай ажлуудыг дуусгаж,  хүүхдүүдээ авахад бэлэн болсон. Энэ онд “Монголын зуслангуудын холбоо”, Хүүхэд гэр бүл хөгжил хамгааллын газраас баримталж байгаа бодлогын хүрээнд “Хүүхдийн зуслан хөтөлбөр”-ийг хэрэгжүүлнэ. Өнгөрсөн онд зорилтот бүлгийн 260 хүүхдийг энэхүү хөтөлбөрт хамруулсан. Энэ оны зургаадугаар сарын 20-ноос уг хөтөлбөрийн хүрээнд  260 хүүхдийг хамруулж, зусландаа үйл ажиллагаа хэрэгжүүлнэ.

---Мөн “Монголын Скаутын холбоо”-той хамтран скаутын ээлжийг “Янзага” зусланд зохион байгуулна. Монголын Хүүхдийн оролцооны үндэсний зөвлөл, Монголын Хүүхдийн зөвлөл, Хүүхдийн хөгжил хамгааллын ерөнхий газар хамтран Монголын хүүхдийн зөвлөлийн “Майхан чуулган”-ыг жил бүр зохион байгуулдаг. Үүний дагуу  долдугаар сарын 6-9-ний хооронд “Янзага” зусланд  Монголын хүүхдийн үндэсний “Майхан зуслан” хөтөлбөрийг авахаар аймгийн удирдлага болон зөвлөлийн тэргүүнд санал тавина. Энэ жилийн хувьд олон ээлжээр хүүхдүүдээ авахаар төлөвлөсөн. Хүүхдийн зуслан хэвийн ажиллана.

---Монгол Улсын хэмжээнд 61 хүүхдийн зуслан үйл ажиллагаа явуулдаг. Үүнээс Хүүхэд гэр бүл хөгжил хамгааллын газарт харьяалагддаг зуслан цөөхөн. Зарим зуслан хувьчлагдсан. Манай аймгийн  хувьд “Янзага” зуслан маань Хүүхэд хөгжил хамгааллын газрын дэргэд ажилласаар ирсэн, цаашид ч үргэлжлэн ажиллана. Үүнтэй холбоотой “Монголын зуслангуудын холбоо”-ноос бүлгийн удирдагч багш нар, тогооч, жижүүр зэрэг албан хаагчдыг чадавхижуулах сургалтыг бүсийн хэмжээнд зохион байгуулах чиглэл өгсөн. Орхон аймагт зургаадугаар сарын 5,6-ны өдрүүдэд Орхон, Булган, Хөвсгөл аймгийн  ногоон бүсийн  хүүхдийн зуслангуудын бүлгийн  удирдагч, багш нар, ажилтан, албан хаагчдыг чадавхижуулах сургалтанд хамруулна.

---Цаашид “Янзага” зусланг жилийн дөрвөн улирлаар ажиллуулж, гэр бүлээрээ ирж амардаг орчин бүрдүүлэхээр шийдвэрдлэсэн. Энэ жилийн хувьд 200-250 хүүхэд хүлээж авна. Хуучин 700-гаад хүүхэд авдаг байсан. Хүүхдийн зуслангийн стандартыг мөрдөж ажиллах шаардлагатай. Засвар үйлчилгээний ажлыг хийж буй гүйцэтгэгч компанид зургаадугаар сарын 25-наас өмнө засварын ажлыг дуусгаж өгөх хүсэлт өгсөн. Засварын ажил дуусмагц хүүхдүүдээ хүлээж авна. Гүйцэтгэгч компаниар “Мээжин Хишиг” ХХК шалгарч ажил нь шуурхай явагдаж байгаа.