Төр, нийгмийн нэрт зүтгэлтэн, БНМАУ-ын Сайд нарын зөвлөлийн дарга, Ардын Их Хурлын тэргүүлэгчдийн дарга, Зэвсэгт хүчний ерөнхий командлагч, маршал Ю.Цэдэнбалын мэндэлсний 100 жилийн ойг орон даяар тэмдэглэж байна. Ой тэмдэглэх тухай УИХ-ын тогтоол ч гарсан. Үүсэн байгуулагдсаны түүхт 40 жилийн ойгоо тэмдэглэсэн Эрдэнэтчүүдийн хувьд нам, төрийн удирдагч Ю.Цэдэнбалын тухайн үед гаргасан шийдвэр нь Булган аймгийн Эрдэнэт хороог өнөөгийн Эрдэнэт хот болоход их үүрэг гүйцэтгэхийн зэрэгцээ дэлхийд данстай Эрдэнэт үйлдвэрийг бүтээн байгуулахад энэ хүний үүрэг оролцоо их байжээ. Тиймээс Эрдэнэтчүүд энэ хүний байгуулсан түүхэн үнэн гавьяа зүтгэлийг үнэлж түүнд хүндэтгэл үзүүлэх учиртай. Аймгийн ИТХ, Засаг дарга, түүний Тамгын газраас “Ю.Цэдэнбалын мэндэлсний 100 жилийн ойг тэмдэглэх тухай” шийдвэр гарган олон ажил хийсэн байна. Аймаг орон нутгийн зүгээс “Эрдэм судлалын төв-Ю.Цэдэнбалын академи”-ийн Орхон аймаг дахь салбартай хамтран түүний мэндэлсний 100 жилийн ойн хүрээнд олон ажил санаачлан зохион байгуулав. Тухайлбал, 1976-1982 оны хооронд Ю.Цэдэнбал дарга тухайн үеийн МАХН-ын Төв хорооны гишүүдийн хамт болон Эрдэнэт үйлдвэрийг бүтээн байгуулж буй ЗХУ-ын нам, төрийн төлөөлөгчдийн хамт Эрдэнэт хотод гурван удаа ирж ажилласан байдаг аж. Энэ үеэрээ үйлдвэрийг бүтээн байгуулж буй барилгачид, Монгол Зөвлөлтийн барилгачин дайчид, уурхайчид, гадаадын мэргэжилтнүүдийн ар гэрийнхэн болон Эрдэнэт хотыг бүтээн босгож буй өнөө цагийн илгээлтийн эзэд, анхдагчдын ахуй амьдралтай танилцаж улмаар нам, төрийн зүгээс тэдний талаар газар дээр нь асуудлыг шийдэж байсан тухай манай ахмадууд хуучилж байна. Ю.Цэдэнбалыг Эрдэнэт хотод ажиллахад нь нэгдүгээр хорооллын хоёрдугаар байрны гурван өрөө байранд байрлуулдаг байжээ. Түүний мэндэлсний 100 жилийн ойн ажлын хүрээнд энэ байрны ханан дээр дурсгалын самбар байрлуулж, аймгийн Номын төвд түүний ажил, амьдралтай холбоотой номын болон гэрэл зургийн үзэсгэлэн гаргасан байна. Мөн “Эрдэнэ судлалын төв Ю.Цэдэнбалын академи”-ийн салбараас “Уурхайчин” соёлын ордонд “Монгол улсын АИХТ-ийн дарга, СнЗ-ийн дарга, БНМАУ-ын баатар, хөдөлмөрийн баатар, Маршал Юмжаагийн Цэдэнбал 100 жил” баярын хурал, эрдэм шинжилгээний хурлыг зохион байгуулсан юм.