Аймгийн Засаг даргын даваа гарагийн шуурхай дээр Цагдаагийн газраас мэдээлэл хийх үеэр дээрх мэдээллийг хийлээ. Өнөөдөр манай аймаг 190 гаруй камертай хэдий түүний гуравны нэг нь буюу 60-70 камер ажиллагаагүй болсон ажээ. Үүний шалтгаан нь серверийн өргөтгөлийн ажилтай холбоотойн зэрэгцээ ашиглалтын зардал төсөвт тэр бүр суудаггүйгээр арчилгаа, тордолгоо хийж чадахгүйн улмаас камерууд ажилгүй болсон байна. Аймгийн хэмжээнд суурилуулсан нийт камерны гуравны нэг нь ажилладаггүй учраас гэмт хэргээс урьдчилан сэргийлэх ажил, гэмт хэргийн илрүүлэлтэд ч тодорхой нөлөө үзүүлдэг гэдгийг цагдаагийнхан хэллээ. Ажиллагаагүй камеруудын ихэнх нь гэр хороололд байдаг учраас энэ оны эхний найман сарын байдлаар гэр хороололд үйлдэгдсэн гэмт хэрэг өсөлттэй гарчээ. Энэ мэдээллийн дараа аймгийн Засаг дарга Д.Батлут холбогдох албаныханд “Энэ талаар судлан санал боловсруулж оруулж ирэх үүрэг” өгсөн байна.