Аймгийн ЗДТГ-ын Хууль зүйн хэлтсээс “Түнт хүрээ” компанид 2016 оны тавдугаар сарын 9-нд “Гэрээг албан ёсоор цуцалсан тухай” Мэдэгдлийг хүргүүлсэн байна. Өөрөөр хэлбэл, мэдэгдэл хүргэгдсэнээр “Түнт хүрээ” машин ачих, журамлах эрхгүй болсон гэж ойлгогдож байна. Гэтэл тэд өнөөдрийг хүртэл машин ачих, журамлах үйлчилгээг явуулж байгаа нь хууль зөрсөн үйлдэл гэдгийг албаны хүн ч тайлбарлаж байна. Энэ талаар бид Ажлын хэсгийн нарийн бичгийн дарга цагдаагийн ахмад Б.Батцэнгэлээс тодруулахад “Ачлагын машин улсын үзлэгт 2015 оны нэгдүгээр сараас хойш ороогүй, бичиг баримтын бүрдэл дутуу, жолоочийн хариуцлагын даатгал байхгүй машинаар ачилт хийхгүй. Дээр нь Хууль зүйн хэлтсээс мэдэгдэл хүргүүлээд гэрээ цуцалсан бол ачих, журамлах үйлчилгээ хийх эрхгүй” гэсэн юм. Яг үнэндээ тавдугаар сарын 9 бус энэ оны нэгдүгээр сард хуралдсан аймгийн ИТХ-ын үеэр Засаг дарга С.Дангаасүрэн энэ компанийн гэрээг цуцаллаа гэдгээ мэдэгдсэн. Тэгвэл гэрээ цуцлагдсан, ачих, журамлах үйлчилгээ үзүүлэх эрхгүй “Түнт хүрээ”-гээр “үйлчлүүлсэн” иргэд аймгийн Замын цагдаагийн тасаг, энэ компани хоёроос мөнгөө нэхэмжилж болох ч юм шиг нөхцөл манай аймагт үүсээд байх шиг. Шүгэл тасхийлээ, цагдаа зогсоолоо, таныг. Саатуулах шаардлагатай гэвэл таныг зогсоосон тэр цагдаа ачлага дуудаад таны машиныг “Түнт хүрээ”-гийн журмын хашаанд хүргэх хууль, эрх зүйн үндэс алга. “Түнт хүрээ” энэ чиглэлийн үйл ажиллагаа эрхлэх зөвшөөрөлгүй, УНВ 17-63 улсын дугаартай машин нь автын үзлэгт ороогүй, тусгай зөвшөөрөлгүй, бичиг баримт дутуу, жолооч нь албан журмын даатгалгүй учраас хөдөлгөөнд оролцох эрх байхгүй. Саатуулах шаардлагатай бол замын цагдаа машиныг жолоодоод цагдаагийн хашаа руу зүглэхээс өөр замгүй болжээ. Эндээс харвал, замын цагдаа нар машин журамлах эсэх нь эргэлзээтэй, журамлах машинаа хаана байлгах нь тодорхойгүй нөхцөл байдалд “Түнт хүрээ” компани хүргээд байна.