Баян-Өндөр сумын Урт булаг баг нь 4300 гаруй хүн амтай томоохон багуудын нэг юм. Тус багт өнгөрсөн жилүүдэд бүтээн байгуулалтын олон ажлыг гүйцэтгэсэн байна. Орон нутгийн хөрөнгө оруулалтаар “Жишиг орц” болгох зорилгоор дараахь ажлуудыг хийжээ. Үүнд, 5,18-р байрны эхний гурван орцыг будаж засварласан. Соронзон кодтой хаалгыг нийт арван байранд суулгасан байна. Уртбулаг багт 2012-2016 онд орон нутгийн хөрөнгөөр дөрвөн тоглоомын талбайг 5,4,3-р байруудад шинээр барьсан. Байр хоорондын явган хүний замын ажил, зарим байрнуудын замыг шинээр сольсон. Мөн 2,3-р байрны явган хүний замыг засаж сэлбэх ажлыг хийжээ. Багийн хүн ам нэмэгдснээр цэцэрлэгийн хүрэлцээ муу байсан учир “Унага” цэцэрлэгийг нэмж ашиглалтанд оруулж, одоо тус багийн цэцэрлэгийн насны хүүхдүүдийн 80 гаруй хувь нь хамрагджээ. Энэ мэтээр хийсэн ажил их байгаа ч ирэх оны төсөвт оруулах зайлшгүй шаардлагатай хүндрэлүүд байна. Энэ тухай Уртбулаг багийн Засаг дарга Г.Цэнгэлмаа: “Уртбулаг багт орон нутгийн хөрөнгөөр хийх нилээдгүй ажил байгаагийн нэг нь байрны дээврийг шинэчлэн засварлах ажил юм. Ялангуяа 19,21,4 -р байрнуудын дээврийг цаг алдалгүй засварлах. Шаардлагатай блокуудад иж бүрэн дээврийн засвар хийх зэрэг хүлээгдсэн ажлууд байгаа” гэж онцоллоо. Орон сууцны СӨХ-дууд байрны дээвэрт хар цаас нэмж наадаг боловч тодорхой хугацааны дараа цоорч, ус дахин гоожиж эхэлдэг. Энэ нь дээврийн даацын стандартыг алдагдуулах улмаар олон жилийн насжилттай байруудад заадас, цуурга гарахад нөлөөлөх эрсдэлтэй гэдгийг багийнхан ярьж байлаа. [sgmb id="1"]