Өнгөрсөн сарын 16-нд аймгийн Засаг дарга Д.Батлут Баянцагаан багийн “Бранк 1” байрны оршин суугчдын хүсэлтийн дагуу уг нийтийн байрны нөхцөл байдалтай танилцсан. Энэ үеэр 30 гаруй жил болсон байрны цахилгаан, бие засах газар ашиглагдах боломжгүй болсон гэж оршин суугчид нь хэлж байсан бөгөөд орон нутгийн зүгээс дэмжлэг хүсч буйгаа уламжилсан юм. Үүний дагуу Засаг дарга Д.Батлут Хотын захирагчийн алба, ГХБХБГ болон Засаг даргын орлогч С.Батжаргалд эл асуудлыг яаралтай шийдвэрлэхийг үүрэг болгосон. Уг байранд 20 гаруй өрх амьдардаг. Зарим хэсгийн цахилгаан нь гэмтэлтэй, коридор нь огт цахилгаангүй,  бие засах өрөөгүй, дээвэр нь нурчихсан, дотор засвар нь муудчихсан байсныг яаралтай засч өрх бүр өрөөндөө “оо”-ын өрөөтэй болж цахилгаанаар хангагдаад байна. Үүнийг орон нутгийн төсвийн хөрөнгөөр шийдсэн юм. Оршин суугч Б.Саранчимэг : Амьдрах  ая, тухтай нөхцөлийг бүрдүүлж өгсөн орон нутгийн удирдлагууддаа баярлалаа -Манай байранд 20 өрх амьдардаг. Бидний амьдрах нөхцөл маш муу байсан. Бохирын шугам байхгүй учир гадаа нийтийн жорлонтой. Байрны коридор гэрэлгүй, дээвэр  муудсан, засвар үйлчилгээ огт хийгдээгүй тул орчин нөхцөл хүнд байсан. Тиймээс бид энэ асуудлыг шийдвэрлэж өгнө үү хэмээн аймгийн Засаг дарга Д.Батлутад хандсан. Төрийн байгууллагууд яаралтай арга хэмжээ авсаны хүчинд өнөөдөр өрх бүр гэртээ “оо” тавих боломжтой боллоо. Мөн цахилгааны асуудлыг шийдэж засвар үйлчилгээ хийж өгсөн байгууллага болон орон нутгийн удирдлагууддаа баярлалаа. Эх сурвалж: Erdenet.mn [sgmb id="1"]