Иргэн Ц.Дэнсмаа -Тийм ээ. “Шүүхдээ баярлалаа” гэдэг үгийг хамгийн түрүүнд сэтгэлээсээ хэлмээр байна. Хэн нэгэнд талархал илэрхийж л байдаг. Гэхдээ “Шүүхдээ баярлалаа” гэж тэр бүр хэлээд байдаггүйн учир нь энгийн нэгэн талархалтай ижил байдаггүйд юм болов уу. Зүрхнээс гарсан үг зүрхэнд хүрдэгтэй адил энэ үгийг сэтгэлийн гүнээс хэлдэг гэдэгт огтхон ч эргэлзэхгүй байна. Би жирийн нэгэн албан хаагч. Төрдөө зүтгэх томилолтыг өвөртлөн Эрдэнэт хотод ирсэнээс хойш боловсролын салбарт 25 жил ирээдүй хойч үеэ сургаж хөгжүүлэх ажилд хоёргүй сэтгэлээр ажилласан нэгэн. Тийнхүү ажиллахдаа эх орныхоо хөгжил цэцэглэлт, Эрдэнэт хотынхоо хөгжил дэвшилд өөрийн хувь нэмрээ чадах хэмжээнд оруулсан хэмээн “бяцхан омогшил”-той хүн билээ би. Эдгээр он жилүүдэд хүүхдийн төлөө гэсэн сэтгэлээр өөрийгөө мартаж ажилласан, хичээсэн, амжилт гаргасан олон өдрүүд бий. Энэ бүхнийг дурьдахын учир нь хэн нэгэнд таалагдаагүйн төлөө, утсаар ярихгүй гэсний төлөө миний бие хандив хүссэн гэх шалтгаар 2015 онд хууль бусаар ажлаасаа чөлөөлөгдсөн. Шүүхийн талаар ойлголт байхгүй учир би нэхэмжлэл гаргахгүй гэж бодож байсан ч ойр дотныхоо хүмүүсийн ятгалгаар шүүхийн байгууллагад хандсандаа үнэхээр баярладаг. Хүний хүсэл эрмэлзлэл, зорилгыг байхгүй болгохын хэцүүг, урам хугарах, зориг мохохын гашууныг, орлогогүйгээр гэр бүлээ тэжээхийн хүндийг жил орчим туулсан. Энэ бүхний эцэст шүүхийн байгууллагын шударга шийдвэрийн ачаар ажилдаа эргэн орсондоо үнэхээр баярлаж байна. Би хэн нэгний надад тусалсан тусыг мартахгүйг хичээдэг ч Орхон аймгийн сум дундын Иргэний хэргийн анхан шатны шүүх байгууллагын шийдвэрийг энэ насандаа ч мартахгүй байх болно. Хүн нийгэмд эзлэх байр суурьтай, хамт олонтой, зорилготой, хүсэл тэмүүлэлтэй өглөөг угтах сайхан. Та бүхний гаргасан шүүхийн шийдвэр хүнд сайн сайхныг цогцлоож байдаг. Нийгмийн ороо бусгаа цаг үе хийгээд, намчирхсан үзэл бодлын дунд жирийн олон иргэн хөдөлмөрлөх эрх, нэр төр, эдийн засаг, үзэл бодлоороо хохирч байгаа нь нууц биш юм. Энэ бүхэнд төрийн ноён нуруу болж, түмэн олны аврал болсон шүүхийн байгууллага ард иргэдээ хамгаалах, хаацайлах, өршөөн энэрэх элч байж, олон хүнийг баярлуулж байгаарай гэж хүсэж байна. Орхон аймгийн Сум дундын Иргэний хэргийн анхан шатны шүүхэд талархал илэрхийлж, хууль засаглалыг хэрэгжүүлэх эрхэм албанд нь амжилт хүсье. [sgmb id="1"]