Эрх баригч МАН-ын Сонгуулийн мөрийн хөтөлбөрт “Эрдэнэт хотын агаарын бохирдлыг бууруулах гэр хорооллын иргэдийн түлээ, нүүрсний хангамжийг сайжруулах” тухай туссан байдаг. Энэ ажлын хүрээнд аймгийн Засаг дарга Д.Батлутын зүгээс Дархан-Уул аймгийн “Нако түлш” ХК-ийн удирдлагатай хамтран ажиллах тухай санаачлага гарган эхний алхмуудыг хийж эхэлсэн. Ингэснээр Шарын голын уурхайн нүүрсийг коксжуулж хэрэглэгчдэд утаагүй түлш болгон хүргэдэг Нако түлш Эрдэнэт хотын гэр хорооллын иргэдийн түлээ нүүрсний хэрэгцээнд ашиглагдахаар болсон ч асуудал үүсгэж байна. Аймаг, орон нутгийн удирдлагууд Эрдэнэтийн хэмжээнд Нако түлш худалдаалах 50 цэгийг эхний ээлжинд байгуулж иргэдэд 25, 40 кг-аар савласан савлагаатайгаар худалдаалахаар болсон . Үнийн хувьд ч иргэдэд дарамтгүй, зах зээлийн үнээр буюу 2800, 4500 төгрөгөөр зарах тухай шийдвэр гаргаж эхний худалдаа ч хийгдсэн. Гэтэл өнөөдрийн байдлаар нийлүүлэгч “Нако түлш” ХК-иас гэрээнд заасан үүргээ биелүүлэх тал дээр хангалтгүй ажиллаж байгаа учир коксжсон нүүрсний хүрэлцээ хангамж муу байгаа аж. Энэ талаар аймгийн Засаг даргын даваа гарагийн шуурхай зөвлөгөөн дээр яригдлаа. Засаг дарга Д.Батлут “Нако түлш борлуулах ажил асуудалтай байна. Миний хувьд агаарын бохирдлыг бууруулах, гэр хорооллын иргэдийн түлээ нүүрсний хангамжийг сайжруулах чиглэлээр Эрдэнэт хотод коксжсон нүүрс хүргэхэд анхаарч ажилласан. Нако түлш компанийн ТУЗ-ийн дарга болон компанийн удирдлагатай ярилцаж хамтран ажиллахаар болсон. Гэтэл өнөөдрийн байдпаар нийлүүлэлт маш муу байна. Иргэд хохирч байна. Иймээс Хотын захирагчийн алба, Хөрөнгө оруулалт, хөгжлийн бодлогын хэлтэс санаачлан дараагийн арга хэмжээг авах хэрэгтэй. Нако түлш компанийнхантай ярилцаж тодорхой шийдвэр гарга. Өөр гарц хай. Асуудлыг шийд” гэсэн үүрэг өгсөн юм. [sgmb id="1"]