Хүйтэн сэрүүний улирал болоод ч тэр үү дарга нарын болон олон нийтийн анхаарлын төвд эрүүл мэндийн асуудал илүүтэй өртдөг. Манай аймгийн хувьд Эрүүл мэндийн газарт хандсан, БОЭТ-д эмчид үзүүлэх гэсэн иргэд ихэсч ачааллаа даахгүй гэхээсээ илүүтэй эрүүл мэндийн байгууллага нь хөл толгой нь олохгүй хэмжээнд хүртлээ эмх замбараагүй болоод байгаа бололтой. Энэ бүхнийг шийдэж, сайжруулахаар томилолт өвөртөлсөн эрхмүүд бол Эрүүл мэндийн газрын дарга М.Баттүвшин, БОЭТ-ийн даргаар томилогдоод удаагүй байгаа Г.Батсүх нар юм. МАН-аас, аймгийн Засаг даргаас итгэл хүлээлгэн эрүүл мэндийн салбарыг хөл дээр нь босгочихно гэж дээрх эрхмүүдийг байгууллагын даргын суудалд тухлуулсан нь мэдээж. Гэтэл эдэнд итгээд хол явахгүй, бахь байдгаараа суух дүр зураг харагдаад байх шиг. Өнгөрсөн долоо хоногийн сүүлчээр шинэ ажилд томилогдсон Г.Батсүх дарга ажлаа авангуутаа БОЭТ-д бүтцийн өөрчлөлт хийж байгаа бололтой бужигнаан, үл ойлгогдох байдал тэнд үүсчээ. Уламжлалт эмчилгээний тасгийг татан буулгах л гэнэ, Амбулаторид байдаг эмийн санг гаргаж өөрийг оруулах, хэн хаашаагаа нүүхээ мэдэхээ байсан дүр зураг БОЭТ-д өрнөж байна. Уламжлалтын эмч нар тасгаа татан буулгахгүй гээд дарга Г.Батсүхдээ хандахад “Би сайн мэдэхгүй. Баттүвшин даргаас асууж байгаад шийдвэр гаргана. Энэ эмийн санг гаргаад өөрийг оруулна. Ямар эмийн санг оруулахыг Баттүвшин дарга мэднэ” гэсэн яриа пүрэв, баасан гарагуудад эмнэлгийн хувьд жинхэнэ жиргээ байсан. Уг нь эрдэнэтчүүд М.Баттүвшин, Г.Батсүх хоёроос эмч, мэргэжилтнүүдийн өвчтөнтэй харьцах харьцааг өөрчлөх, иргэдийг өвдөөд ирэхэд нь тосч аваад үйлчилдэг иргэн төвтэй үйлчилгээтэй байгууллага болгоод өгөх болов уу гэж харж байгаа. Өнөөдөр иргэд хүүхэд нь халуурч бүлээрэхэд шууд л БОЭТ-ийн Хүүхдийн тасаг руу аваад явдаг. Ном журмаараа бол эхлээд өрхийн эмнэлэгтээ ханддаг байх ёстой тухай дарга нар ярьдаг. Хамгийн түрүүнд өрхийн эмнэлэгтээ ханддаг сэтгэлгээг Эрдэнэтийн иргэдэд ойлгуулах тал дээр ажлаа эхлүүлэхийн оронд тамга, тэмдэг атгангуутаа “гол дүрийн баатар”-т тоглодог, араасаа бусдыг дагуулан гуйж гувшуулдаг хүнд сурталтангууд болдогт нь иргэд шүүмжлэлтэй хандаж байна. Дээрх дарга нар эхлээд бүтцийн өөрчлөлт гэж бужигнуулж өөрсдийгөө “үнэд оруулж”, хойноосоо гүйлгэхээ хамгийн түрүүнд хэрэгжүүлж буйг аймаг, орон нутгийн удирдлагууд мэдэхгүй, мэдрэхгүй байна. Шуурхай дээр “өвчлөл нэмэгдэж байгаа, ачаалал 2-3 дахин хэтэрсэн” гэж шалтаг тоочихоос илүүтэй шинэ менежмент нутагшуулах хэрэгтэй байна, БОЭТ-д. Түүнээс биш сонгуульд нэр дэвшээд, ялагдангуутаа Улаанбаатар руу шилжинэ гэж намынхандаа тунирхаад дараа нь дарга болонгуутаа бүтцийн өөрчлөлт хийх нэрээр эрүүл мэндийн салбарыг бужигнуулдаг удирдлага Эрдэнэтэд хэрэггүй. Эрүүл мэнд, эмнэлэг боловсролын салбарт дарга нарын цүнх баригч, суганы үс, жангүмүүд очихлоор “муу дээрээ муухай, муухай дээрээ улцан” болгоод байна. Бүтцийн өөрчлөлт хийдэггүй, ажил хийдэг дарга бидэнд хэрэгтэй л байнасанж. [sgmb id="1"]