Олныг бишрүүлэх бүтээл тань арвин байг             Орших бие тань эрүүл жаргаж байг             Оюун ухаан тань цэлмэг сэтгэж байг             Онд мэнд явж, хишгээ түгээж байг             Шинэ жилийн мэнд дэвшүүлье.             Орчлон хорвоод нэгэн жил улирч, буурал түүхийн хуудаснаа нэгэн шинэ мөр эхлэх гэж байна. Энэ торгон мөчид хүн бүр улиран буй жилийнхээ алдаа оноо, амжилт бүтээлийг дэнслэн байгаа биз ээ. Эрхэм Эрдэнэтчүүд та бүхэндээ шинэ он, шинэ жилийн мэндийг Эрдэнэтийн “Дулааны цахилгаан станц” ТӨХК-ийн хамт олны нэрийн өмнөөс болон хувиасаа хүргэж байна.             Бид хуучин оноо амжилт бүтээлээр үдэж, шинэ онтойгоо учран золгож байна. Ирж буй 2017 он манай хамт олны хувьд чухал үйл явдлууд давхацсан онцлог жил болж байгаа. Учир нь тэртээ 1987 онд анхны зуухаа галлаж байсан манай хамт олон 30 жилийнхээ түүхэн ойг тэмдэглэх гэж байна. Мөн станцынхаа хүчин чадлыг нэмэгдүүлж, өргөтгөл барихаар болсон нь томоохон бүтээн байгуулалтын ажил болно гэж үзэж байгаа. Энэ ажилд манай хамт олон одооноос бэлтгэж, мэргэжилтнүүдийнхээ чадварыг дээшлүүлэхэд анхаарч байна.             Цаг хугацаа улирах тусам хүмүүний орчлон хөгжил дэвшлийн зүг урагшлан байгаа шиг бидний хамт олон нэгэн үзүүрт сэтгэлээр зорилгынхоо төлөө ажиллаж байна. Манай байгууллагын үе үеийн түүхийг бичилцэж ирсэн ахмад, дунд үеийнхэндээ болон ирээдүйн хөгжлийн түүчээ болсон залуустаа ирж буй 30 жилийн ойн мэнд дэвшүүлье. Та бүхэн ирж буй шинэ ондоо аз хийморьтой, амжилт бүтээлээр дүүрэн байж, юу санасан бүхэн нь биелж байхын өлзийтэй ерөөл өргөе. Эрдэнэтийн “ДЦС” ТӨХК-ийн захирал Л.ЭРХБААТАР [sgmb id="1"]