БОЭТ-ийн дарга Б.Батсүхийн аймгийн Засаг даргын шуурхай дээр хийсэн мэдээллээс харвал энэ байгууллагын хоёрдугаар сарын цалингийн сан 37 сая төгрөгөөр хэтэрсэн байна. Үүний шалтгаан нь БОЭТ-ийн өмнөх удирдлага болох Д.Цэрэндагва тэргүүтэй нөхөд яамнаас батлагдсан орон тооноос хэтрүүлэн хүн авч ажиллуулсанаас ийм байдалд хүрсэн гэнэ. Өөрөөр хэлбэл, салбарын яамнаас БОЭТ-ийн орон тоог 479 эмч, сувилагч, үйлчилгээ, аж ахуйн ажилтан байхаар баталсан атал өнөөдрийн байдлаар 511 хүн ажиллаж байгаа нь ийнхүү цалингийн сан хэтрэхэд хүрсэн хэмээн Б.Батсүх дарга амьсгаа дээгүүр мэдэгдэл хийж байна. Түүний мэдээллээс харвал өмнөх удирдлагын хууль бус үйл ажиллагаанаас үүдэн БОЭТ цалингийн өрөнд орж байгаа. Үүнээс гарахын тулд 32 орон тооны хэтрэлттэй хүнийг ажлаас нь халж байж л сая нэг зөв голдиролдоо орох юм байх. Аймгийн Эрүүл мэндийн газрын дарга М.Баттүвшин, БОЭТ-ийн дарга Б.Батсүх нар МАН-ын ялалтын бялуунаас хамгийн түрүүнд хүртэж ажил, албан тушаалтай болсон эрхмүүд. Ажил аваад ч багагүй хугацаа өнгөрсөн. Гэтэл гэнэтхэн “гал” тахиа жилийн анхны шуурхай дээр БОЭТ-ийн дарга Б.Батсүх яаран сандран “Цалингийн сан 37 сая төгрөгөөр хэтэрсэн. Энэ сарын 15-наас эхлэн 32 хүнийг ажлаас нь хална. Өргөдөл гомдол гээд их юм болох байх даа” хэмээн гэнэтхэн мэдэгдэл хийж байгааг иргэд төдийгүй эмнэлгийн ажилчид, МАН-ын удирдлагууд ч ойлгохгүй байна. Тэдний хувьд 32 хүнийг ажлаас халах мэдэгдэл өгч хоолноос нь салгаснаар асуудал шийдэгдэж бүх зүйл хэвэндээ орно гэж тооцсон нь том эндүүрэл аж. Ер нь МАН, АН хоёр нам орон нутагт ялж ээлжлэн төр барьж тоглож байхад “хариуцлага” гэдэг үг тэдний үгсийн сангаас хасагддаг. Удирдлагад нь хариуцлага тооцох ёстой байтал 32 хүнийг ажлаас халснаар асуудлаа шийдэх гэж байгаа Б.Батсүх тэргүүтний хувьд зургаадугаар сарын 26-нд болох Ерөнхийлөгчийн сонгуульд нэр дэвшин өрсөлдөх МАН-ын дарга, УИХ-ын дарга Миеэгомбын Энхболдод өгч буй “гэнэтийн бэлэг” гэж ойлговол үнэнд нийцнэ. Үүний зэрэгцээ аймгийн Засаг дарга Д.Батлутын хувьд “Ажилгүй, орлогогүй өрх бүрээс нэг хүнийг ажилтай, орлоготой болгоно” хэмээн мөрийн хөтөлбөртөө тусгаж эхнийхээ алхмуудыг хийж эхэлсэн. Гэтэл МАН-ын багт багтаж, эндээс БОЭТ-ийн даргын суудлаар шагнагдсан Б.Батсүх тэргүүтнүүд ажилчдаа ажлаас халж, ажилгүйчүүдийн эгнээнд 32 хүнийг багтаахаа мэдэгдэхээс өөр илүү ажил хийх чадваргүй гэдгээ харуулах бололтой.            Нийтдээ 37 сая төгрөгөөр хэтрээд байгаа цалингийн сан 32 хүнийг ажлаас халснаар шийдэгдэхгүй. Харин ч “тэмээн дээр ямааны гарз” гэдэгчлэн шүүхийн шийдвэрээр иргэдийг хохиролгүй болгохын тулд Б.Батсүх тэр байтугай мөнгөний асуудал дагуулахаар болоод байна. [sgmb id="1"]