УИХ-ын эрхэм гишүүн О.Содбилэгийн иргэд, сонгогчидтой хийх уулзалтад УИХ-ын гишүүн, Засгийн газрын гишүүн, Хөдөлмөр, нийгмийн хамгааллын сайд Н.Номтойбаяр оролцож Засгийн газраас хийж хэрэгжүүлж байгаа ажлын талаар мэдээлэл өглөө. Тэрбээр “Монгол улсын Засгийн газраас улсын төсөв санхүү, эдийн засаг хүндэрсэн ч гэлээ иргэдийн хувьд цэцэрлэгийн хүрэлцээ хангамж санаа зовоосон асуудал хэвээр байгаа. Иймд Засгийн газраас нэгэн шийдвэр гаргасныг та бүхэнд дуулгая. 2017 онд Орхон аймагт улсын төсвийн 1.2 тэрбум төгрөгийн хөрөнгө оруулалтаар 150 хүүхдийн цэцэрлэг барих асуудлыг шийдсэнийг дуулгахад таатай байна. Би Орхон аймагт хоёр дахь удаагаа ирж байна. Өнгөрсөн найман сарын хугацаанд сайдын хувьд 14 аймагт ажилласан. Ажлын шаардлагаар гадаад оронд ажилласан. Гэтэл би өөрийн сонгогдсон тойрог Дорнод аймагтаа одоо болтол очиж чадаагүй явна. Одоо намайг очиход манай сонгогчид над руу чулуу шидэх байлгүй. Тиймээс та бүхэн Дорнодод таньдаг мэддэг хүн байвал намайг Эрдэнэтэд хоёр дахь удаагаа ирж ажилласан гэж хэлж өгөөрэй. Өнөөгийн УИХ-ын гишүүдээс хамгийн өндөр боловсролтой нь О.Содбилэг гишүүн. Түүний өндөр боловсрол, эзэмшсэн мэргэжлийг нь ашиглах үүднээс УИХ-ын дарга, Ерөнхий сайд нар үүрэг даалгавар өгч гадаадад ажиллуулсан. Үүний үр шим нь удахгүй гарна. Миний хувьд УИХ-ын гишүүн О.Содбилэг, Н.Цэрэнбат нартай гар нийлэн ажиллаж хуулийн төсөл боловсруулах чиглэлд анхаарч байгаа. Мөн танай аймгийн удирдлага Д.Батлут надтай олон удаа уулзаж хамтран ажиллаж байна. Би удахгүй Хөвсгөл аймагт ажиллана. Буцахдаа Эрдэнэтээр дайрч эмнэлэгийн байгууллагаар орж ажиллана. Үүгээр орж үзэж бодит нөхцөл байдалтай танилцаач гэсэн хүсэлтийг аймгийн Засаг дарга тавьсан. Мөн миний “хуурай ах” аймгийн ИТХ-ын дарга П.Пүрэвлхагва байна. Оны өмнөхөн УИХ-ын гишүүн О.Содбилэг Эрдэнэтэд зорилтот бүлэгт чиглэсэн зээл олгох зорилготой 100 сая төгрөгийн сан бүрдүүлж өгөх хүсэлт тавьж байсан. Аймгийн засаг дарга ч мөн Итгэлцлийн зээлийн санд чамгүй хэмжээний мөнгө олгуулахаар хүсэлт гаргасан. Энэ бүхний дагуу Хөдөлмөр, нийгмийн хамгааллын яамнаас зорилтот бүлэгт чиглэсэн, жижиг дунд үйлдвэрлэлийг дэмжих, итгэлцлийн зээлийг хөгжүүлэх зорилгоор нэг тэрбум 380 сая төгрөгийг шийдэж өглөө. Үүний 834 сая төгрөг нь зорилтот бүлэг, залууст чиглэсэн хөрөнгө мөнгө юм. Энэ 834 сая төгрөгийн тал нь буюу 400 гаруй сая төгрөг нь эргэн төлөгдөнө. Үлдсэн нь эргэн төлөгдөхгүй. Үлдсэн 500 гаруй сая төгрөг нь итгэлцлийн зээлийн хүрээнд олгогдоно.Засгийн газар ОУВС-тай ярилцаж байгаа. Тэдний эхний шаардлагууд ч хүнд байсан. Бид боломжгүй зүйлээ үгүй гээд л хэлдэг. Тухайлбал, тэдний зүгээс хүүхдийн мөнгө, халамжийг тана, багш эмч нарын цалинг 30 хувь бууруул, төрийн албанаас 20 мянган иргэнийг хал гэх зэрэг шаардлага тавьсан. Үүнийг хүлээж аваагүй. Энэ мэтээр олон ажил хийж байна. УИХ-аас Эрдэнэт үйлдвэрийн 49 хувийг эргүүлэн авах тухай шийдвэр гаргасан. Үүнд танай аймгаас сонгогдсон О.Содбилэг, Д.Дамба-Очир нар иргэдийнхээ талд байсан. Харин нөгөө нэг гишүүн О.Баасанхүү эсрэг санал өгсөн. Одоо тэр хүн Эрдэнэтэд ирээд та нарын нүүрийг яаж харах бол. МАН-ын хувьд хувьчлал буруу гэж үзээгүй. Харин Ч.Сайханбилэгийн Засгийн газар үүргээ биелүүлээгүй. Хууль тогтоомж зөрчсөн учраас энэ асуудлыг 100 хувь төрд авах тухай ярьсан ” гэлээ. [sgmb id="1"]