“Жи тайм” сүлжээний Эрдэнэт дэх топ менежер Д.Чулуунбаатарыг цагдаагийнхан саатуулаад, тодорхой нөхцөлтэйгээр өнгөрсөн долоо хоногт сулласан гэж дуулдана. Энэ хүн цагтаа Эрдэнэтийн Тагнуулын газрын даргаар ажиллаж байсан, хуульч хүн. “Жи тайм” сүлжээний буянаар санхүүгийн пирамидын оройд нэлээн хэдэн удаа гарч тухай бүртээ 20 сая төгрөг халаасалсан гэгддэг Д.Чулуунбаатар менежер Монгол дахь таван автомашины эзний нэгээр тодроод байсан удаатай. Монгол улс шаталсан пирамид хэлбэр бүхий сүлжээний бизнесийг хуулиараа хориглодог. Тиймдээ ч цагдаагийн байгууллагаас “Жи тайм” сүлжээг улсын хэмжээнд үйл ажиллагаа явуулахыг нь хориод байгаа. Гэтэл хорих тусам нь хөгждөг гэдэг шиг “Жи тайм”-ын араас “Биткойн, Ванкойн” гээд сүлжээний бас нэгэн бизнес Эрдэнэтэд газар авч байна. Саяхан даа, нэгэн танил маань Хүрэнбулаг багийн “ХААН банк”-ны гадна таараад “Дэлхийн санхүүгийн чиг хандлага, ирээдүйн мөнгө Биткойн, Ванкойн болж байгаа. Чи 140 мянган төгрөгөөр одоо элсвэл жилийн дараа гайгүй машины үнэтэй болно. Ноён доллар ч үнэгүйднэ, өнөө муу халтар Төгрөг маань ч бүр сураггүй болох тавилантай” гээд л авч байна. Явуулаад байвал яваад байх нь ээ, янз нь. Нэг их удалгүй “Жи тайм”-ын араас “Биткойн, Ванкойнд мөнгөө өгөөд алдчихлаа” хэмээх эцэс төгсгөлгүй яриа Эрдэнэтээр нэг хөвөрч чи, бидээ тулах нь. Биткойн, Ванкойны талаар иргэдэд үнэн зөв мэдээлэл өгч, үнэхээр бизнесийн зарчмаар гарч ирсэн бол тэр байгууллагууд нь хянаж, Монгол улсын хууль дүрмэнд нийцэж байгаа эсэхэд одооноос хяналт тавихгүй бол “Жи тайм”-ын араас орохгүй гэсэн баталгаа алга. Арга нь улам нарийсч, 140 мянган төгрөгөөр сүлжээ хэлбэрээр хүн элсүүлээд эхэлчихэж. Ниргэсэн хойно нь хашхирсанд орвол одооноос хууль хяналтынхан эргэж тойрвол иргэд хохирохгүй л болов уу.      Ер нь тэгээд ч пирамид хэлбэрийн сүлжээний бизнесийн учрыг, Монголд хориотой гэдгийг нь тэр бүр жирийн иргэд ухахгүй, мэдэхгүй л дээ. Харин мэдээлэлтэй, тэрүүхэн тэр бөндгөртөө хэдэн “юмтай” нөхөд эхэлж ороод бусдыг уриалаад өрөмийг нь аваад хусман дээр нь жирийн иргэдийг зодолдуулчихаад гараад явчихдаг ид шидтэй бусдыг уруу татдаг гэх юм билээ. Аймгийн Засаг даргаар 2000-2012 оны хооронд ажиллаж байсан МАН-аар овоглосон дарга нар, аймгийн Цагдаагийн газрын даргын суудалд тухалж байсан нэр бүхий эрхмүүд Эрдэнэтэд “Жи тайм” сүлжээг оруулж ирэн цэцэглүүлж, бүр зарим нэг нь 10 шахам удаа пирамидын оройд гарч 20 гаруй сая төгрөгийг нь авсан тухай үнэн худал нь тодорхойгүй яриа үлгэр домог шиг л хөвөрч байна. [sgmb id="1"]