Засаг даргын зөвлөлийн хурлаар “аймгийн Хөдөө аж ахуйн талаар баримтлах бодлого”-ыг авч хэлэлцсэн. Манай аймгийн хэмжээнд өмнө нь хөдөө аж ахуйн талаар баримтлах дэд хөтөлбөр байгаагүй аж. Хүнс, хөдөө аж ахуйн газраас боловсруулсан энэхүү дэд хөтөлбөрийн хүрээнд Орхон аймаг хөдөө аж ахуйн талаар баримтлах дэд хөтөлбөртэй болох юм. “Манай аймаг газар тариалангийн төв бүсэд оршдог. Газар тариалангийн хувьд дунд, эрт үеийн тариалалт хийх боломжтой. Цаашлаад энэ даваа талдаа тулгуурласан сортыг газар тариаланд нутагшуулж га-гаас авах ургацын хэмжээг нэмэгдүүлэх боломжийг бүрдүүлэх болно. Мал аж ахуйн хувьд Орхон аймаг эрчимжсэн мал аж ахуйг хөгжүүлэх боломжтой. Засгийн газраас мах, сүүний аян зарлаж байгаа. Аяны хүрээнд хийгдэх ажлууд ч энэ дэд хөтөлбөрт туссан. Махны нөөцийн сан бүрдүүлэх чиглэлээр ажиллана. Манай аймгийн хувьд малын гоц халдварт өвчний голомтот суурьгүй. Гэсэн ч мал сүргийг эрчимжүүлэх тал дээр вакцинжуулалтад хамруулах ажил цаашид ч хийгдэнэ. Өвчний голомтгүй гэдэг бидний хувьд үнэхээр давуу тал. Үүнийгээ ч хамгаалахад анхаарна. Мөн аймгийн иргэдийн хэмжээнд өрхийн тариаланг хөгжүүлэх чиглэлд анхаарч байгаа. Тэр дундаа өвлийн аж ахуйг хөгжүүлэх чиглэлд ажил хийхээр тусгасан” хэмээн аймгийн ХХААГ-ын дарга Ж.Бат-Өлзий дэд хөтөлбөрийн талаар дэлгэрэнгүй танилцуулсан юм. Үүний дараа Засаг даргын зөвлөлийн гишүүд хөтөлбөрийн талаар асуулт асууж, өөрийн саналаа илэрхийлсэн. -А.Түвшинжаргал: Гиндерекцийн хашаанд гүү унагалж гэнэ хэмээн саяхан шуугиж байсан. Хотын төвд мал бэлчдэг асуудал хавтгайрлаа. Малчин багийг байгуулах талаар яригдаж байна. Энэ асуудлууд туссан уу? -Ж.Бат-Өлзий: Малчин багийн чиглэлээр хөтөлбөрт тусгагдаагүй. Хотын төвд мал бэлчдэг асуудлаар зэргэлдээх сумдын удирдлагатай ярилцсан. Манай аймгийн малчдын хувьд бэлчээрийн даац хэтэрсэн. Энэ нь ч тодорхой хэмжээгээр хотын төвд мал бэлчихэд нөлөөлж байгаа. Зэргэлдээх сумдын малчдын хувьд бүтээгдэхүүнээ зах зээлд нийлүүлэхийн тулд Эрдэнэт хотод зундаа ойр зусдаг. Энэ нь эргээд манай малчдыг тодорхой хэмжээний хязгаарлагдмал нөөцтэй бэлчээрээ эргэн ашиглах боломжгүй нөхцөлд хүргэдэг тал бий. -Д.Соёлчхүү: Зэргэлдээх сумын гэлтгүй манай малчид ч сүүлтэй, сүүлгүй чоно байхгүй гэдэг нэрээр Эрдэнэтийн төв рүү малаа зүглүүлдэг. Одоо сүүлдээ хот тохижуулах газар эзэнгүй малтай хөөцөлдөж байна. Энд тодорхой бодлого барихгүй бол хотын төвөөр мал, хүн, машин гурав зэрэгцээд л явах нь. [sgmb id="1"]