Баян-Өндөр сумын ЗДТГ, Мал эмнэлэг, үржлийн тасагтай хамтарч малын худалдаа , арьс шир ил задгай худалдан борлуулж буй асуудлыг шийдвэрлэх ажлын хэсэг ажиллуулсан байна. Өнгөрсөн нэгдүгээр сард мал, ил задгай махан бүтээгдэхүүний, арьс ширний худалдааг “Таван эрдэнэ” зах дээр төвлөрүүлэх сумын Засаг дарга захирамж гаргасан ч хэрэгжилт муу байгаа юм. Хотын төвд мал, амьтны гаралтай мах, махан бүтээгдэхүүн, арьс ширийг худалдан борлуулах нь хүнсний аюулгүй байдал, эрүүл ахуйн шаардлагад нийцэхгүй байгаа юм. Өнгөрсөн жилүүдэд сар шинийн баяр, улсын баяр наадмыг тохиолдуулан наадмын талбайн автомашины зогсоол дээр мал, мах худалдах, үйлчилгээ эрхлэхийг зөвшөөрдөг байсан. Энэ зөвшөөрөл нь олон асуудал дагуулдаг байсан. Тодруулбал, ариун цэврийн зориулалтын газар байхгүй, худалдаа эрхлэгчдийн гарын ариун цэвэр муу байдаг. Цаашлаад тухайн хэсэгт хог шороо их цуглардаг , орчин тойрноо бохирдуулдаг. Эдгээр байдал нь иргэдийн эрүүл мэндэд сөргөөр нөлөөлөх эрсдэлтэй юм. Орон нутгийн зүгээс махны ил задгай, эмх замбараагүй худалдааг цэгцлэх зорилгоор “Таван-Эрдэнэ” захыг байгуулж үйлчилгээ явуулах нөхцөлийг бүрэн хангасан. “Таван-Эрдэнэ” захын захиргаанаас нийгмийн хариуцлагаа биелүүлж автомашин зорчих нөхцлийг бүрдүүлсэн. Мөн дэргэдээ мал эмнэлгийн лаборотори байгуулсан байна. Тус төвөөр дамжиж байгаа мах нь эрүүл ахуйн шаардлага хангасан шинжилгээний бичгийг дагалдуулж иргэдийн гарт очиж байгаа юм. [sgmb id="1"]