Сонгуулийн Ерөнхий Хорооноос хийсэн мэдээллээс харвал энэ удаагийн сонгуульд нэг сая 357мянга 788 сонгогч буюу нэийт сонгогчдын 68.27 хувь нь санал хураалтад оролцжээ. Нэр дэвшигчдийн хувьд М.Энхболд 411,748 санал буюу 30.32 хувь Х.Баттулга 517,478 санал буюу 38.11 хувь С.Ганбаатар 409,899 санал 30.19 хувийн санал авсан байна. Нэр дэвшигчдийн хэн нь ч олонхийн санал авч чадаагүй тул СЕХ-ноос хоёр дахь шатны санал хураалт явуулах шийдвэр гаргажээ. Ингэснээр хамгийн олон санал авсан Х.Баттулга, М.Энхболд нарыг дахин санал хураалтад оруулахаар болов. Гадаадад байгаа сонгогчдын санал хураалт долоодугаар сарын 4-нд болох юм. Хоёр дахь санал хураалтын зардалд улсын төсвөөс 7.2 тэрбум төгрөг зарцуулах тооцоо гарчээ. Ерөнхийлөгчийн сонгуулийн тухай хуульд “Нэр дэвшигчид 50+1 хувийн санал авснаар ялалт байгуулна” хэмээн заасан. Энэ хуулийн 105.1-д “Ерөнхийлөгчийн сонгуульд нэр дэвшигчдийн хэн нь ч анхан шатны сонгуулийн нэгдсэн дүнгээр олонхийн санал аваагүй бол хамгийн олон санал авсан хоёр хүнийг хоёр дахь санал хураалтад оруулна”, 105.2-т “Сонгуулийн төв байгууллага хоёр дахь санал хураалтыг анхны санал авсан өдрөөс хойш 14 хоногийн дотор зарлан, зохион байгуулна” гэж заажээ. [sgmb id="1"]