ГОК-ын овоолгоостой шороог “Ачит Ихт” компани ахин угааж боловсруулах замаар шороотой хаягдсан алт, зэсийг гаргаж авах шинэ технологи, ноу-хау хийснийх нь төлөө үйлдвэрийн 34 хувийг улс өөртөө авчихлаа. Асар богино хугацаанд, хууль шүүхийн тогтоолгүй асуудлыг шийдчихэж байгаад нь баяр хүргэж, алга ташъя. Нэгэнт “Эрдэнэт үйлдвэр”-ийг тойрсон хувийн хэвшлийг шалгаж, булааж авдаг жишээ тогтоож байгаа бол овоолгон дээр цэцэглэсэн үлдсэн дөрвөн компанийг ч орхихгүй шалгах юм байгаа биз. Эсвэл зөвхөн Ц.Элбэгдорж, П.Цагаан хоёрын компанийг л "дээрэмдэх" даалгавартай байсан юм уу.

“Хувийн хэвшлийнхэн, сэтгэдэг, бүтээдэг хүмүүсийнхээ нуруун дээр ардчилсан бүү хэл коммунист улсын эдийн засаг оршин тогтнодог” гэдэг. Нутгийн иргэдэд хувь хүртээх ардчилсан зарчим ярихаар өлгөж авч өөртөө булаадаг коммунист дэглэм тогтоох гэж байгаа бол хоёр дахь Ерөнхийлөгч Н.Багабандийн  удирдаж байгаа "Эрдмин" компанид шалгалт оруулаач. Үүсгэн байгуулсан  Ш.Отгонбилэг агсаны гэр бүл, удаах захирал Л.Дамдинжав, Уул уурхайн сайд байсан н.Рэнчинхандын гэр бүл, “Эрдэнэт концерн” хувь эзэмшдэг. Энэ компани овоолгоны компаниудаас анхдагч нь. Одоогийн байдлаар үйлдвэрлэлийн технологи нь байгаль орчинд маш аюултай нөхцөл байдал үүсгэсэн. Үйл ажиллагааг нь шууд хаах нөхцөл байдал үүсээд байгаа.  Мөн 30 гаруй жил молибден олборлосон Еврэй эзэнтэй байсан нууцлагдмал “Шим Технологи” компанийг “Эрдэнэт үйлдвэр”-ийн хөрөнгөөр байгуулж байсан. Уг үйлдвэр нь зэсээс хэд дахин илүү үнэтэй молибдений концентрацийг дахин боловсруулдаг. “Шим Технологи” компанийн үйлдвэр одоогоор зогссон ч суурин дээр нь нууц байдлаар молибден боловсруулж буй гэх мэдээлэл буй. Яагаад гэвэл “Эрдэнэт үйлдвэр” ажиллаж байгаа учир зэс, молибдений овоолго гарч л байгаа. Эдгээрийг илчлэн "хайрт намдаа" булааж авна уу, харж байя. Мөн саяхан байгуулагдсан “Эрдэнэт үйлдвэр”-ийн овоолгон дээр ажилладаг зэс боловсруулах “Гал сэнтий” ХХК байна.

Нэмээд хэлэхэд, эрдэнэтчүүдийн хандив, хүчээр бий болсон “Зэс эрдэнийн хувь” компани байна. Нүднийх нь урд залилан хийгээд иргэдийг хуурч компанийн эрхийг гадныханд арилжчихаад хөлжиж баяжаад Их хуралд нэр дэвших гэж яваа Д.Алтанхуяг гээчийг хуулийн өмнө чирч ирээд хувь, хувьцааг нь иргэдэд олгуулаарай. Сар хүрэхгүй хугацаанд шалгаж булаах чадвараа гайхалтай харуулсан Л.Оюун-Эрдэнийн Засгийн газар эхлүүлсэн ажлаа ганцхан компаниар дуусгахгүй юм байгаа биз.