“Эрдэнэт үйлдвэр” ТӨҮГ-ын уурхайчид өнөөдрийг хүртэл Баян-Өлгий аймгийн Дэлүүн сумын иргэн Сержаны, Дорнодын Халх сумын  өрхийн үйлдвэрлэгчийн тог, цахилгааны мөнгийг төлж байгаа. Цар тахлын давагдашгүй хүчин нөхцөл байдлын өмнө Засгийн газраас гаргасан шийдвэрийг уурхайчид нэг талаар нэр төртэй биелүүлж байгаа гэсэн үг. Нөгөө талаас нь авч үзвэл стратегийн чухал ач холбогдолтой “Эрдэнэт үйлдвэр”-ийн тасралтгүй үйл ажиллагааг хангах чиглэлээр Монгол улсын Засгийн газар, Эрүүл мэндийн яамнаас тодорхой арга хэмжээ авч ажиллаж байна. Үүний нэг нь энэ сарын 9-нөөс эхэлсэн үйлдвэрийн ажилтнуудын дархлааг сэргээж дэмжих зорилгоор хэрэгжүүлж буй вакцинжуулалтын 3 дахь тунд хамруулах ажил юм. Вакцинжуулалтын эхний өдрийн талаарх мэдээллийг үйлдвэрийн Хэвлэл, мэдээллийн албаны мэдээллээс үзэхэд, чихэнд чимэгтэй мэдээлэл дуулдах нь тэр. Вакцинжуулалтад үйлдвэрийн уурхайчид идэвхтэй хамрагдаж байгаа аж. Ганцхан өдрийн дотор 2130 уурхайчин, үйлдвэрийн ажилтан вакцинжуулалтын 3 дугаар тунд хамрагджээ. Вакцинжуулах ажлыг зохион байгуулагчдын зүгээс нэг өдөрт 1984 хүнийг 3 дахь тунгийн вакцинд хамруулж  4 хоногийн дотор энэ ажлын ард гарахаар төлөвлөсөн аж. Нэг үгээр хэлбэл уурхайчид вакцинжуулалтын төлөвлөгөөг 107 хувиар давуулан биелүүлсэн гэсэн үг.

Хэлж ирдэггүй хийсч ирдэг цар тахлын эхэн үед үйлдвэрийн захиргаа эхний ээлжинд ажилчдаа вакцинд хамруулах зорилт тавьсан. Үйлдвэрийнхээ бүх ажилтан албан хаагчдыг  Вероцеллын 1, 2 дугаар тунд хамруулсан. Нэгэнт л хүн төрөлхтөн коронатай хөл нийлүүлэн амьдрах болсон учраас  дахиад л нийтээрээ  3 дугаар тунд зайлшгүй хамрагдах шаардлага амьдралаас урган гарсан. Энэ удаад үйлдвэрийн захиргаа Монгол улсын Засгийн газар, Эрүүл мэндийн яаманд хандахад төр засгийн зүгээс ч тасралтгүй үйл ажиллагаа явуулдаг, онцгой объект болох “Эрдэнэт үйлдвэр”-т Файзерын 7 мянган хүн тун вакцин  нийлүүлсэн байна. Файзер вакциныг  Америк, Герман улсууд хамтран үйлдвэрлэсэн. Өөрөөр хэлбэл, Евро стандартын шаардлага хангасан, Дэлхийн эрүүл мэндийн байгууллагаас хамгийн түрүүнд санал болгож байгаа вакцин. Эрүүл мэндийн байгууллага, вакицинаторуудын зүгээс “иргэн Бат та Вероцеллын 1,2 дугаар тунг  хийлгэсэн бол гуравдагч тунд Файзерыг сонго” хэмээн зөвлөж байгаа.

Үйлдвэрийн удирдлагын зүгээс вакцины 3 дугаар тунг хийхдээ ажилчдынхаа санал, хүсэлтийг хамгийн эхэнд эрэмбэлжээ. Вакцинжуулалт сайн дурын үндсэн дээр хийлгэх ёстой ч өнөөдөр монголчуудын амь нас, эрүүл мэндийг  вакцинжуулалт хамгаалах болоод байгаа. Уурхайчид ч үүнийг ойлгож хамрагдалт нь ийм өндөр хувьтай гарсан болов уу. Вакцин хийхдээ урт дараалал үүсгэхгүй, богино хугацаанд энэ ажлын ард гарахын тулд Спорт ордон, Ерөнхий захиргааны нэгдүгээр байр, Засвар механикын завод, Дулааны станц зэрэг 4 цэгт тарилгын цэг байгуулан ажиллаж байгаа аж. Түүгээр ч үл барам тэрхүү 7 мянган хүн тун Файзер вакцины үлдсэн хэсгийг нь ажилчдынхаа ар гэрийнхэнд сайн дурын үндсэн дээр хийхээр төлөвлөсөн байна. Энэ бүхнээс харвал уурхайчид, ажилтан албан хаагчид маань үйлдвэрийн захиргаа, удирдлагын зүгээс зохион байгуулж буй вакцинжуулалтын 3 дугаар тунгийн ажилд идэвхтэй хамрагдаж хагас өдрийн ч өмнө болтугай энэ ажлын ард гарахаар зүтгэж байна. Уурхайчдын ярианд өдөр, сар, жилийн төлөвлөгөө гэсэн үгс түлхүү хэрэглэгддэг. Тэр ёсоор уурхайчид вакцинжуулалтын төлөвлөгөөг ч давуулан биелүүлж байна.       

Таны, манай гэр орны тог цахилгаан, дулааны тоолуур тасралтгүй гүйж байгаа, яг энэ мөчид. Харин бидний халааснаас овойж оцойсон мөнгө төгрөг гардаггүй. Харин үйлдвэрийн уурхайчдын хүч хөдөлмөр, тасралтгүй үйл ажиллагаа айл өрхийг гэрэлтэй, дулаахан байлгахад чиглэж Эрдэнэтийн уурхайчдын дуслуусан хөлс бүрт Монгол айл бүрийн тог, цахилгааны мөнгө төлөгдөж байгааг мартах учиргүй.