Эрдэнэт үйлдвэрийн Ил уурхайн олборлолтын зардлын 45 хувийг технологийн тээвэр эзэлдэг. Уурхай гүнзгийрэх тусам тээвэрлэлтийн дундаж зай уртсаж, тэр хэрээр зардал байнга өсөн нэмэгдэж байна. Иймээс үйлдвэрийн газрын удирдлагууд уулын цул тээвэрлэлтэд мөчлөгт урсгалт тээврийн технологи буюу хосолмол тээврийн систем нэвтрүүлэхээр шийдвэрлэж Эрдэнэт үйлдвэрийг 2031 он хүртэл хугацаанд хөгжүүлэх үндсэн чиглэлд тусгасан. Энэ ажил өнгөрсөн хавар ХБНГУ-ын “3В TEC AUFBEREITUNGSSYSTEME” компанитай “түлхүүр гардуулах” нөхцөлтэй гэрээ байгуулснаар эрчимжсэн юм. “Эрдэнэт үйлдвэрийн зүгээс төслийн хэрэгжилтэд хяналт тавих, зохион байгуулах ажлын хэсэг байгуулагдан гүйцэтгэгч компанитай хамтран ажиллаж байна. Уулын цул тээвэрлэлтийн зардлыг 37 хувиар, хүдэр олборлолтын өөрийн өртгийг 20 хувиар бууруулах энэхүү ажлын техник, эдийн засгийн үндэслэл боловсруулах, тоног төхөөрөмжийн нарийвчилсан зураг гаргах ажил дуусаж, үйлдвэрлэлийн шатанд шилжлээ. Одоогоор эхний ээлжийн 19 чингэлэг ачаа газар дээрээ ирсэн бөгөөд 120 тонн металл хийц хилээр гараад вагонд ачигджээ. Мөн хөрсний инженерийн судалгаа, өрөмдлөг хийгдэж байна. Удахгүй барилга угсралтын ажил эхэлнэ” гэж Ил уурхайн Ерөнхий инженер Д.Уламмандах мэдээллээ. 

Жилээс жилд өсөн нэмэгдэж буй үйлдвэрлэлийн хүчин чадалд нийцэх, үр ашиг авчрах энэхүү бүтээн байгуулалт 2022 оны долдугаар сард ашиглалтад орно.