Төгссөн сургууль:
1999 онд ШУТИС-ийн Уул уурхайн сургууль, 2007 онд ШУТИС-ийн КТМС-ийг тус тус төгссөн

Мэргэжил:
Ашигт малтмалын баяжуулалтын технологич

Ажилласан туршлага:
“Эрдэнэт үйлдвэр” ТӨҮГ-ын Баяжуулах үйлдвэрт ээлжийн мастер, ээлжийн дарга, технологич, хэсгийн дарга, албаны даргаар 23 дахь жилдээ ажиллаж байна

Мэргэжил дээшлүүлсэн байдал: 
2004 онд ОХУ-ын Уралын Баяжуулах үйлдвэрт мэргэжил дээшлүүлж, 2009 онд Сингапурын Темасек сангаас зохион байгуулсан бүтээмжийн ахисан түвшний сургалтад хамрагдсан

Чин хүсэл:
Эрдэнэт үйлдвэр анхны баяжмалаа ачуулж, хилийн чанадад экспортолсон энэ түүхэн өдрийг уурхайчид баяр бахдалтайгаар угтаж байна. “Эрдэнэт үйлдвэрийн төрсөн өдөр” тохиосон энэхүү баярын өдрөөр Баяжуулах үйлдвэрийн мянга мянган уурхайчдаас нэгэн төлөөллийг урьсан нь А.Машбаяр юм. Ажлын арга барил, хүнтэй харьцах, хариуцлага даах чадвар гээд удирдлага хүнд л илүүтэй байх ур чадваруудыг эзэмшсэн тэрээр өнөөдөр өчигдрөөсөө ахисан байхыг илүүд үздэг нэгэн. Тиймдээ ч ээлжийн мастераас Үйлдвэр техникийн албаны дарга болтлоо дэвшин ажиллажээ. Хийж бүтээсэн зүйлтэй, эргээд харахад харамсахгүйгээр амьдрахыг хүсдэг тэрээр Эрдэнэт үйлдвэрийн хөгжил дэвшилд өөрийн хувь нэмрийг оруулах Эрдэнэт үйлдвэрийн үнэт баялаг билээ. 

-Таны амьдралын сэргээш?
-Гэр бүл, найз нөхөд, ажил, хобби. Хоббиндоо цаг зарцуулах нь тархийг дахин ачаалж, ажиллаж амьдрах эрч хүчийг нэмдэг.

-Өөртөө хэвшүүлсэн эерэг дадал?
-Аливаа зүйлээс эерэг, сайн талыг нь олж харахыг хичээдэг. Эхэлсэн ажлын эцсийг нь үзтэл тууштай байхыг эрмэлздэг.

-Таны ажлын бүтээмжийг дээшлүүлдэг гол зүйл?
-Төлөвлөлт сайн аливаа ажлын үр дүн, бүтээмж өндөр байдаг. Нэг хүн дангаараа хийдэг ажил манай цехэд байхгүй. Иймд хамт олонтойгоо сайтар ойлголцож багаар ажиллах нь чухал. 

-Хийж байгаа ажлын тань онцлог?
-Цаг хугацаатай л уралддаг ажил гэж хэлнэ. Алдагдсан боломжийг эргэж нөхнө гэсэн ойлголт байдаггүй. Иймд аливаад мэдрэмжтэй, мэдлэг мэдээлэлтэй байхыг манай ажил шаарддаг.

-Ойрын өдрүүдэд ямар ажил амжуулахаар төлөвлөж байна вэ?
-Өөрөө нунтаглах хэсгийн өргөтгөлийн үндсэн тоног төхөөрөмжийн нэг болох “Metso” фирмийн хацарт бутлуурын туршилтын залгалт, тохируулгын ажлыг эхлүүлэхээр ажиллаж байна. Цехийнхээ төрсөн өдөр буюу 12 дугаар сарын 14-нд ашиглалтад хүлээж авна.

-Эрдэнэт үйлдвэр таны харах өнцөг, үзэл бодол, итгэл үнэмшилд хэрхэн нөлөөлж байна вэ?
-Ажил амьдралаа холбосон үйлдвэр, Эрдэнэт ууландаа залбирч явдаг. Нөөц бололцоо, мэдлэг чадвараа бүрэн зориулж ажиллахыг хичээдэг. Эрдэнэт үйлдвэрийнхээ ирээдүйг өөдрөгөөр хардаг. Үүний төлөө хөдөлмөрлөх итгэлтэй байна.

-Залуучуудад өгөх таны зөвлөгөө?
-Өнөөдрийн амьдрал тань таны өчигдрийн бодлын биелэл гэж ярьдаг. Энэ их ортой үг санагддаг. Сайн сайхныг сэтгэж, тэмүүлэлтэй байгаарай гэж хэлье дээ.

-Таны 5 хүсэл?
-Элэг бүтэн, төлөв төвшин амьдралыг цогцлоож чадвал ажлын амжилт, ахиц дэвшил аяндаа гарна. Мөн эрүүл байх чухал, бусад нь учир нь олдоно.

-Эрдэнэт үйлдвэр анхны баяжмалаа ачуулсан баярт өдрийг тохилдуулан мэндчилгээ дэвшүүлнэ үү?
-Үйлдвэрийнхээ түүхэн ойн баярын мэндийг нийт ажилтнууд, хамтран зүтгэгчдэдээ дэвшүүлье! Үе үеийн баяжуулагчдын хичээл зүтгэл, нөр их хөдөлмөрийн үр дүнд үйлдвэр маань өнөөдрийн хөгжлийн түвшинд хүрсэн. Бидний үе энэ эрчийг алдуулахгүй их үйлсийг цааш нь түүчээлэх үүргийг хүлээн авсан гэж миний бие ухамсарладаг. Эрдэнэт үйлдвэрийнхээ хамт олонд ажлын өрнүүн их амжилтыг хүсье!