Уурхайчдын их наадмын сагсан бөмбөгийн эрэгтэйчүүдийнтэмцээн үзүүштэй, харууштай, хариад ярих юмтай сайхан болж байна. Хагас шигшээд шалгарах эрхийн төлөө “Эрдэнэт үйлдвэр” ТӨҮГ-ийн “Эрдэнэт” баг “Оюутолгой” компанийн “Оюутолгой” багтай өрсөлдлөө.

Тоглолтын эхний оноог “Оюутолгой” баг алсын зайн шидэлтээ оновчтой болгож 3 оноо авч тэргүүлж эхэллээ. Тэд дахин довтлохдоо нэмээд 3 оноо авах нь тэр. “Эрдэнэт” багийн тамирчин өрсөлдөгч багаа довтлох үед нь хувийн алдаа хийснээс болж довтолгоогоор 2, нэмэлт шидэлтээр 1 оноо авч 6 оноотой болсноор “Оюутолгой” баг огшиж эхэлсэн дээ. Нэмээд торгуулийн шидэлтээс 1 оноо авах нь тэр.

“Оюутолгой” багийн дасгалжуулагч баг тамирчдаа урамшуулж, “Зоригтой, хатуу, чанга бай л даа. Та нарт боломж байна. Чаддаг юм аа хий л дээ” хэмээн үүрэгдэж байлаа.

“Эрдэнэт” багийнхан ч тоглолтын эхэнд гаргасан цочмог гэмээр алдаагаа дахин давталгүй өгөө аваатай явсаар тоглолтын оноог нэг их удалгүй 8:9 харьцаатай болгож амжсан. Нэгдүгээр үе дуусахад 2 минут 25 секунд дутуу байхад “Эрдэнэт” баг 2 оноо авснаар тоглолтын тооны харьцаа 14:13 болж тэргүүлж эхэллээ. Энэ эрчмээ алдахгүй явахад “Эрдэнэт” багт хожих боломж байгааг зэргэлдээ суудалд суусан сагсан бөмбөг сонирхогчид ч үнэлж байлаа. Үзэгчдийн итгэлийг алдахгүй довтолгоогоо амжилттай хийснээр дахин 3 оноо авч 17:13 болгоод авах нь тэр, “Эрдэнэт” багийнхан.

Нэгдүгээр үеийн төгсгөл дөхөх үед “Оюутолгой” нэмж ердөө 2 оноо авсан бол “Эрдэнэт”-ийн сагсчид нэмж 4 оноо авснаар тооны харьцааг 21:15 болгов. “Эрдэнэт” багийн довтолгоо амжилттай болохын зэрэгцээ хамгаалалт тун дажгүй байсан нь өрсөлдөгчдөд нь үнэхээр хүнд байлаа.

Нэгдүгээр үеийн төгсгөлийн тоглолт ширүүхэн эхэллээ. “Оюутолгой” багийнхан тоглолтоо эрчимжүүлж 2 оноо авлаа. Тус багийн 13 дугаартай холбогч тамирчин үнэхээр элдэвтэй эр байлаа. Түүний араас хамгаалалт хийж байсан “Эрдэнэт” багийн тамирчин яаж ч чадалгүй эвгүй алдаа хийснийг шүүгч хараад амжиж. Шууд л шүгэл тасхийж “Эрдэнэт” багт техникийн алдаа өгөх нь тэр.  Ийнхүү алдаа, оноо авалт үргэлжилсээр тоглолтын тооны харьцаа 25:18-ын  болов. “Эрдэнэт” баг тооны хувьд илүүрхсээр, “Оюутолгой”-нхон онооны араас нэхсээр. Нэгдүгээр үеийн цаг дуусахад нэг минут ч хүрэхгүй, 59 секунд үлдсэн үед “Оюутолгой” завсарлага захиалав. Тооны харьцаа энэ үед 29:21, “Эрдэнэт” баг давамгайлж байлаа. Завсарлагын дараа “Эрдэнэт” баг дахин 1 оноо авлаа. Тооны харьцаа 30:21. Тоглолтын нэгдүгээр үе дууссаныг мэдэгдэн шүүгч шүгэл тасхийлгэхэд тооны харьцаа 32:23-аар тоглолт өндөрлөв.

Хоёрдугаар үе эхлэхэд багууд аль болох алдаа бага гаргахын хичээж байв. Тиймдээ ч “Эрдэнэт” багийнхан тооны хойноос нэг их хөөлгүй хамгаалах тактикт шилжсэн байв. Харин өрсөлдөгчид нь энэ хооронд оноог ойртуулж 32:27 болгоод амжив.”Эрдэнэт”-ийнхэн 2 оноогоор тоогоо нэмэхэд өрсөлдөгч нар нь мөн л даагаа нэхэн 2 оноог халааслав. Хоёрдугаар үеийн тоглолтын төгсгөл ойртлоо. Тооны харьцаа 36:29, “Эрдэнэт” баг 7 онооны илүүтэй болов. Хоёрдугаар үеийн сүүлчийн нэг минут үлдэхэд тооны харьцаа 39:31. Сүүлдээ хоёр багийн шидсэн бөмбөг цагаригт орох үнэхээр дургүй болов. Шидэлтүүд ч дутаж байлаа. Ингэсээр цаг дуусахад тоглолт өндөрлөв, тооны харьцаа 39:31. “Эрдэнэт” баг илүүрхэж “Оюутолгой”-г буулган авснаар хагас шигээд шалгарав. Тэдний дараагийн хүчтэй өрсөлдөгч нь “Багануур” багийн сагсчид байлаа.